自俄羅斯入侵烏克蘭以嚟，除咗激起烏克蘭人執戈抵抗，好多難民亦都重拾烏語課本，矢志學好烏克蘭文。事緣好多烏克蘭人本身都係讀俄文長大，喺而家愛國熱情下都想學好祖國語言；二來俄羅斯人同烏克蘭人外貌相近，要辨別奸細就要靠語言，當地警察同平民仲會用烏克蘭嘅特有詞匯，例如麵包паляниця (Palianytsia)去辨別敵我。

烏克蘭其實東部同南部唔少人母語係俄文，甚至總統澤連斯基都係。但今次戰爭就令好多烏克蘭人決心學好烏文。據報道，自全球關注烏克蘭局勢，用手機app學烏克蘭話嘅人上升咗5倍，其中有成200萬嘅走難去前往嘅波蘭，當地學烏克蘭話嘅人數更加上升咗26倍。更有學者發起籌辦網上課程，畀走難嘅家長都可以教導小朋友。語言學者Iryna Farion就形容話：「烏克蘭話就係我哋嘅前線，文字就係我哋嘅子彈。」

烏克蘭政府亦都要求軍中溝通都要以烏克蘭話進行，即使講得好差嘅士兵。烏克蘭軍警同平民遇上可疑人民，都會用啲烏克蘭話嘅詞彙測試對方，睇下對方講唔講得正。其中最常用嘅詞係 паляниця (Palianytsia)，一種烏克蘭嘅傳統麵包，因為俄羅斯人好易讀做 Palianitsia 或者 Palianitsa。

#俄羅斯入侵烏克蘭 #俄烏戰爭 #俄羅斯入侵烏克蘭 #俄羅斯 #烏克蘭 #語言 #母語 #烏克蘭語 #烏克蘭文 #烏克蘭話 #港語學