邊種話係最性感嘅語言，向來眾說紛紜，但最近嘅科學研究顯示可能係意大利話。有機構統計英文以外13種常用嘅國際語言，發現意大利話最令人「怦然心動」，而我哋香港人聽得多嘅普通話就未能名列前茅，屈居第7位。

電子語言學習平台 Preply 嘅實驗方法係，搵咗志願者一路收聽挑逗嘅激情對話，科學家同時就記錄佢哋嘅心率，再同佢哋平時嘅心率做比較，做咗個性感語言排行榜。最性感嘅意大利話可以令心跳加速23%，其次係葡萄牙話（20%）同法文（18%）。香港人小學讀到中學嘅普通話，就排喺俄文、西班文話、希臘話之後，屈居第7位。

參與研究嘅語言學家認為，意大利話好似唱歌咁一個元音（vowel）接一個輔音 (consonent），每個音節都讀音分明，聽落去好有音樂感，具吸引力。而多輔音嘅語言只得荷蘭話同德文就冇咁有吸引力，「冇咁有音樂感」，最低只係得12%，係意大利話嘅一半效果。

可惜嘅係，被譽為「音樂語言」，聲調變化豐富嘅廣東話未有納入研究。唔知廣東話如果擺入研究，會排行第幾呢？

#意大利話 #葡萄牙話 #西班牙話 #俄文 #希臘話 #法文 #韓文 #波蘭話 #普通話 #日本話 #德文 #印度話 #荷蘭話 #港語學