八月一號係乜嘢節日？對於天主教會同聖公會嚟講，就係「聖彼得鎖鏈日」，紀念門徒彼得被政權迫害坐監嘅時候，有天使下凡解救佢。不過，對於身兼立法會議員嘅聖公會牧師管浩鳴，就出圖提大家今日係「八一建軍節」喇。
管浩鳴今日（1號）張貼八一建軍節海報，提醒市民要向保家衞國的人民軍隊致敬（❤️），並且紀念中國人民解放軍建軍95周年，仲對咗個聯（？），「鐵馬守四方，俯首甘為孺子牛」。
不過，其實今日都係教會嘅「聖彼得鎖鏈日」，紀念天使下凡為耶穌門徒彼得行神跡，幫佢解開鎖鏈，脫離政權逼害。教會就將每年八月一號訂為此日，每年今日都會為被政權逼害嘅人祈禱。
睇返其他立法會議員社交媒體Facebook，都見唔到呢個節日消息。管牧師愛國之心始終如一，可見一斑。
#管浩鳴 #聖公會 #立法會議員 #天主教 #聖彼得 #聖伯多祿 #stpeterchains #解放軍 #中國節日 #八一建軍節 #建軍節 #港語學