因為聖芳濟有同學食早餐被罰，有網友講起早餐同學校教育嘅關係。講到「香港博雅教育之父」嶺南大學前校長陳坤耀教授，當年推行咗一個「校長早餐」計劃，似乎推崇備至。
約食早餐特別對大學生嚟講，係十分剎有介事同醒神嘅表現。因為以大學生通宵達旦嘅生活節奏，朝早用嚟補眠為主，早餐會係十分遙不可及。以前我玩ocamp，就試過成班同學玩到凌晨四點，起唔到身食營地早餐。去到營地飯堂，適逢一班小學生喺到dem beat：「我起到身（啪啪，啪啪啪），我做到人！（啪啪，啪啪啪）我起到身（啪啪，啪啪啪），我做到人！（啪啪，啪啪啪）……」何其諷刺。
不過早餐會有冇意義，都係睇同邊個食。敝校浸大都有搞過早餐會。2019年，時任學生會會長方仲賢被捕後，學生要求同校長可以正面對話。呢個訴求，竟然「成功爭取」到。錢大康當時連辦十場早餐會，我正值休學，返part time之前，都特登Book個session去見識下。
如我所料，現場就好似之前嘅學生諮詢論壇咁，學校訂咗校內連鎖咖啡店嘅小食，有英式鬆餅、煙三文魚三文治、以及一大桶mocha咖啡！而在場居然只有大陸學生，並無其他本地生，於是我扤頭扮聽佢哋啲對答，連連起身去斟咖啡，三文治。
錢大康特登問：「山神你做乜淨係食嘢，唔出聲嘅？」
我答話：「學生講嘅意見你哋邊次有聽？我想食返份學費返嚟咋。」
錢大康臉上都係嗰副微笑，完場仲意猶未盡咁搵我影相。鬼咩，俾我一年收七球人工，每日袋住兩萬銀紙，我都可以四萬咁口㗎。
再上一次同佢哋玩早餐會已經係「佔領語文中心」之前，嗰時同副校周偉立去Bistro Bon食，傾普通話豁免試單嘢。我已經話豁免試一定會專登為難學生，講到明係唔會收貨。
周偉立拍晒心口話一定唔會玩嘢，到時淨係考基本普通話溝通能力，合格率估計會過九成，過幾年仲取消埋普通話課程添！
我而家最後悔係，冇好似另一個同學咁，喺早餐時段叫嗰個成舊水嘅All day breakfast……
