由康文署公共圖書館主辦嘅香港中文文學雙年獎獲選作品被DQ，引起軒然大波。消息指，舊年評審已揀出兩本得獎詩作同一本候補得獎作品，但當局事隔到至昨日（廿五號）先公布賽果，當中新詩組嘅雙年獎及推薦獎「從缺」。據悉，獲推介得獎嘅3本詩集係俾當局取消資格（DQ），呢3本詩集舊年12月喺公共圖書館被下架。
《明報》去信康文署查詢有關事件。署方回應指，「圖書館安排的活動須遵守香港法律，雙年獎評審工作也以此原則處理」。因為疫情，雙年獎工作需較長時間完成，所以先延後公布得獎結果。署方表示：「如個別組別的參賽作品未達有關標準，該組別的獎項便會從缺。」
據了解，涉事3本詩集為周漢輝嘅《光隱於塵》、陳李才嘅《漫長的霧 黝黑的光》，同曾詠聰嘅《戒和同修》，分別獲評審推介為雙年獎、推薦獎及候補得獎。前兩本著作被指同雨傘運動及示威有關，而曾詠聰就提過詩作同諾貝爾和平獎得主劉曉波有關。消息人士透露，當局在評審後安排兩本得獎作品「送審」，結果就係被DQ。
文學比賽被政府審查並唔係第一日嘅事。早喺20年底，港語學舉行嘅三區廣東話徵文比賽喺評審決定賽果後，因為當中有提到「移民」等字眼，被當局以作品影響社區和諧為由，禁止出版。三區徵文比賽至今亦未獲發還撥款。
#文學比賽 #香港文學 #香港文學比賽 #中文文學雙年獎 #香港詩集 #香港詩作 #政治審查 #DQ #廣東話 #廣東話徵文比賽 #港語學
參考明報報道：