繼中文文學雙年獎新詩組3本詩集被康文署撤銷獎，本港有傳媒發現，康文署公共圖書館嘅比賽都加入咗國家安全條款，列明參賽者或作品唔可以違反《港區國安法》或「不利於國家安全」，包括歷時多年嘅全港詩詞創作比賽同中小學生參加嘅世界閱讀日創作比賽，都喺比賽條款新增國安字句。條款寫明，如果作品違法，參賽學生需要「承擔法律責任」。
康文署回覆《明報》話，公共圖書館一直都確保藏書同活動必須符合香港法例，因此參加者都要遵從有關要求。至於負責判斷作品有否違國安法嘅職員職級及文學資歷、有冇上訴機制，署方就無回應。
全港詩詞創作比賽9月已經頒獎。出年初截止嘅閱讀日比賽以「閱讀好滋味」為主題，俾學生圍繞惜食、烹飪同飲食三個主題撰寫讀後感或繪畫。
#康文署 #全港詩詞創作比賽 #香港文學 #創作自由 #藝術自由 #廣東話 #港語學