浸會大學傳理學會原定喺上星期擺攤位收集信件，以喺聖誕節前寄出慰問在囚嘅人士，但係不但俾校方禁用場地一個月，而且傳召籌辦活動嘅同學至紀律聆訊。據悉，校方收到有校外人士投訴，有關活動「欠缺教育成份」、「為公眾帶來不便」，因此暫停有關活動。

傳理學會原定上個禮拜喺學系大樓地下舉行「筆見•不散」活動。據悉，學會部分成員分別收到校方嘅口頭和書面警告，學會都被禁止使用學校場地一個月。

浸大回覆《獨立媒體》查詢，指根據大學規定，學生組織如需申請使用校園場地舉辦活動，必須就活動性質和內容提供清晰和確實的資料。傳理學會就指，學會最初提交租場申請時寫錯資料，後來雖然作出更正，但係校方以此為由，更懷疑學會有意誤導學校。

傳理學會喺公開貼文表示，為確保會員嘅人身安全，會取消有關活動。佢哋又話，愈趨惡劣嘅政治環境下，空間越見狹窄，「希望每位傳理人能謹記院訓『不平則鳴』」學會其後撰文呼籲大家，用唔同方式去關心一班牆內人士。

港語學主席陳樂行曾以法律程序挑戰浸大紀律聆訊，成功撤銷停學令。佢直言，浸大紀律程序往往先入為主、未審先判，學生一般都「有冤無路訴」。「調轉，我以學生身分投訴過違反逗留條件、毆打被捕嘅大陸學生，校方都全部都唔受理。點解校外人士用政治理由胡亂控訴浸大學生，又照單全收呢？」佢建議DSE考生多留意有關院校處理學生事件嘅新聞報道，有選擇嘅情況下盡量遠離浸會大學。

#浸大 #浸會大學 #香港浸會大學 #寫信 #在囚人士 #牆內手足 #寫信師 #港語學