考評局今日（8號）公布即將開考嘅文憑試安排。喺連續三年英文口試因疫情取消後，首年會喺三月尾開始復考。但係本月撤銷口罩令後，考評局仍然維持要求戴口罩，其中英文口試更改動座位安排，考官與考生相距3米。有考生擔心，會因為聲量唔夠嘅問題而影響英文口試嘅表現。

停辦三年嘅英國語文科口試，將會喺3月21日至30日恢復舉行。考評局話，雖然政府已取消各項社交距離措施，但考評局仍然會喺試場採取預防感染嘅措施，包括量體溫、戴口罩、填寫「考生健康申報表」等，以保障考生同考務人員嘅健康。

考評局話，DSE英文科口試，會增加考試室，考生座位之間相隔約一米距離。考生亦需在整個口試期間戴上口罩。考評局提醒，考生喺發言時應盡量提高聲量，確保口試主考員同其他考生能聽到其發言，以及口試錄影系統能清楚收音。

有學生擔心以上措施會影響考試表現。今屆應考生黃同學就話，學校都預計到恢復英文口試，操練時都有戴口罩，照戴影響唔大。不過，以往喺學校嘅練習就無相隔一米距離咁多，「口罩又遮咗把聲，距離又遠，一來擔心自己講嘢考官聽唔到，二來其他考生講嘢自己都未必聽到，咁好難回應，又冇得睇口形。」

黃同學就話，希望可以抽到聲音洪量啲嘅對手，咁大家都可以互有對答。另外，今次DSE試場都規定需要打開窗戶，保持空氣流通，考生都擔心考場學校嘅噪音會影響口試及聆聽嘅表現。

#hkdseoral #hkdseenglish #英文口試 #igotoschoolbybus #hkdse #香港英文 #香港中學生 #香港考試 #dsers #廣東話 #英文 #港語學