近日公共圖書館下架書籍風波不絕，社會憂慮學校圖書館會否跟從。教育局局長蔡若蓮昨日（16號）喺北京接受傳媒訪問時就承認，「有向學校圖書館主任或相關學科提供清晰明確的指引」，學校要揀「優質、唔會畀到學生錯誤信息嘅圖書。」
蔡若蓮話，「唔會就某一類書講一定可用或一定不可用」，認為老師有專業能力去判斷。不過，有學校圖書館主任就透露，教育局人員喺巡視後都會勸喻唔好將部分書籍上架。
學界組織「優質圖書館網絡」創會會長呂志剛接受本地傳媒訪問時話，學校圖書館一早已經將六四事件等書籍，以及含政治隱喻嘅書如《1984》、《動物農莊》，以及通識科書籍落架。而部分書籍亦都喺教育局人員巡視後被勸喻下架，例如魯迅書籍被教育局人員指「鼓勵學生上街」，台灣作家龍應台作品亦被指不應出現於館藏之中。
#圖書館 #香港圖書館 #學校圖書館 #香港禁書 #廣東話 #港語學