英國《泰晤士高等教育》（THE）公佈2023年度亞洲大學排名，以坐擁6間亞洲百大為榮嘅香港今年終於失守，皆因浸會大學跌出100名以外。而喺亞洲各大學嘅國際化程度普遍上升情況下，香港大學國際化評分卻下跌0.5分至97.3分。THE仲專登用返香港政府數據話，中國大陸學生人數喺2021/22學年按年升13%。

排名按照13個指標釐定。THE表示，今年嘅排名顯示，亞洲院校在文獻出版引用丶全球知識和思想傳播的影響力不斷增強，當中尤以「引文」在過去五年嘅平均得分顯著提高。而「國際化」評分就考慮本地同國際師生比例，香港嘅大學國際化評分平均為97.3分，較去年微跌0.5分。除咗浸會大學跌出百大外，其他大學總成績排名都不變或略有提升。

香港浸會大學近年積極喺大陸錄取學生，除咗用簡體字、普通話拍片宣傳，仲喺大陸各省份都搞唔少簡介會。但浸大向來都以「亞洲百大」招徠大陸人，今次跌出百大，恐怕對於喺大陸收生都有一定影響。

#香港大學 #大專學界 #浸大 #浸會大學 #hkbu #浸大山神 #廣東話 #港語學 #大陸學生