香港網民慣稱精神病人為「白卡」，但可能呢個稱呼都涉及歧視。尋日《明報》總編輯陳錦強撰寫道歉文章，指日前「叄頭陸臂」專欄寫咗篇題為《白色通行證》嘅文章，提到近日持刀傷人案同精神病醫護人手不足問題，當中一句「「勿讓白卡成為擾亂社會秩序，破壞社區安寧的通行證。」備受爭議，最終明報總編同專欄作者都為此致歉。

陳錦強承認，題目和內容均對殘疾人士有標籤及歧視之嫌。文章引起多方關注後，《明報》立即通知專欄須結束。陳錦強強調明報「對弱勢社群及殘疾人士向來也特別眷顧有加」，曾經採訪學者籲社會勿標籤精神病患，今次事件特為未盡把關之責道歉。

至於專欄寫作母隊「豐美股肥」亦為此道歉。佢哋話文章係團隊實習生撰寫，而佢哋冇審稿就交畀明報，已主動聯絡明報即日停止有關專欄，並為文章引起嘅傷害真誠道歉。

其實「白卡」呢個詞語唔等於精神病，係「殘疾人士登記證」，不過因為證件白色而有呢個俗稱，呢個名亦都廣為社福界、醫生同傳媒使用。

不過，近年隨住網絡興起，「白卡」呢個詞語亦都開始演變成鬧人係精神病人嘅詞彙，例如可以鬧人「你白卡㗎」去質疑對方是否患有精神病。無論如何，今次事件相信都會令香港各界更加審慎用詞去照顧精神病患嘅感受。

#白卡 #精神病 #殘疾人士 #香港精神病 #廣東話 #港語學