當日聽到葉劉在立法會回答慢必，話牛丸可以唔洗理真定假，好食就得，真係聽到火都來。大家可能都覺得葉劉咁答真係擺明搏打。喂，大佬人地大陸用三聚青氨整的奶粉都好有奶味，你係唔係同我飲左佢？之但後你又可能話兩樣野唔可以相題並論呀年輕人，兩個例子對身體的影響有好大分別架﹗三聚青氨食到生腎石架，但係牛肉丸啲牛肉變左豬肉都一樣好有肉類營養呀，你點可以用一樣食得死人的野來同啲完全對人體無害的野食來做比較呢細路，好食就得啦～擺明呃like呀你～

之但係你都係錯囉，葉劉。豬肉做的牛丸入面係加左啲野搞到佢好似牛丸咁囉，你鬼知食左係唔係對你真係有益？仲有你知唔知呢個世界有人唔食得豬肉架，可能佢地係對豬肉有敏感，更加可能係佢地係回教徒。信回教啲人食左豬要落地獄架。你有冇唸過如果香港有個信回教的人行街肚餓唸住食牛丸醫肚，食完先知係豬肉做，佢會有咩感覺？佢直頭覺得你殺左佢呀～

其實講到尾，真假同味道都係偽命題。最最最重要果樣野，亦都就係假牛丸同假普選係一樣，都係冇尊重人對價值的自由選擇。點解牛丸唔可以做假，係因為要尊重想真係食到牛肉丸的人的選擇，等佢地可以響公平公開公正咁選擇到啱自己食的野，有就有，冇就冇，唔係唔覺唔覺咁俾另外啲野「頂住先」，咁樣食果個係唔會覺得自己的選擇受到尊重；就好似普選一樣唔可以假，因為要尊重每一個香港人都有一樣公平的被選、提名同投票的權利一樣，俾候選人公平競爭，選民用選票響公平公正公開的選舉入面選擇香港的特首，選到就選到，選唔到就選唔到，唔係俾啲人用啲奇怪的標準揀過先到我揀，咁做法一樣都係唔尊重香港人對特首的選擇。