本週之星，應該非謝志峰莫屬。一句「我係義無反顧嘅大中華膠」，應該都道出唔少我叔父輩一代人嘅情感歸屬同族群想像。不過哩個大中華膠嘅代表人物，對中港矛盾嘅來龍去脈，又知道幾多？

其實俾人叫做膠，唔係啲咩好嘢來。有啲人之所以俾人鬧做膠，就係因為一種為咗精神上堅持自己信念同情感客觀正確，而不問世情，最後不惜轉移話題，偷換慨念嘅行事作風。正如「左膠」一詞，被罵嘅人以為自己身處於意識形態之爭，覺得係因為自己偉大嘅理想終於出頭啦，俾「盲毛」攻擊啦，就一知半解咁將個罵名掛喺身上，獲取一種「橫眉冷對千夫指」嘅殉道浪漫。

哩一種膠化嘅浪漫同行事作風，喺一講到個議題就會突然發作，繼而極力護短，而謝志峰本人就作出咗一個標準示範。先唔講佢「客觀嘅感覺」上覺得香港係中國地方，大家「黃皮膚黑頭髮」，所以歷史文化同祖共宗之類嘅族群偏見（因為林忌都已經開口埋口日插夜插，都已經講得好詳細），居然「何不食肉糜」咁同你講「香港多普通話你咪學吓囉﹗」，再九唔搭八咁同你講可以用普選來忘記中港矛盾，將今時今日香港人面對香港不再香港嘅問題，全部歸咎於民主政制承諾未能得到兌現嘅香港人急於搵人來出氣。佢咁做完全係為咗將自己保留喺大中華感情想像入面嘅浪漫小宇宙之中，而用屬於其他範疇嘅問題去解釋本土文化板塊正被強權粗暴撕裂嘅問題，但求自己繼續可以自我陶醉喺大中華敍述堅定正確性嘅想像之中，無視香港今日你我身邊發生緊嘅切身問題，故息養奸。感性情懷完全遮蔽咗社會觸角，用自證自明嘅所謂「客觀感覺」主導自己嘅思維判斷，咁樣對公共議題討論，尤其是謝先生作為論壇主持人，哩種流於自我覺感良好嘅浪漫好明顯對討論毫無幫助。

當然，佢最唔明嘅，都應該係香港中文用詞嘅改變同點樣去界定一種語言實唔實用。所謂「粵普之爭」，除咗係用廣東話嘅問題定係用普通話，以及廣東話嘅地位被人惡意貶抑嘅問題，仲係香港本來用開嘅字都變得「大陸化」，尤其是音譯出來嘅翻譯都變哂用普通話嘅音譯去取代香港原有用廣東話嘅音譯。作為新聞專業，佢冇可能留意唔到杜拜已經變成迪拜，如果有一日「風沙中想起你，哀傷多麼赤裸」嘅時候，都冇得「夜遊杜拜」；航空公司「維珍尼亞」變成「弗吉尼亞」，弗吉者，不吉也，將人哋公司名改得咁失禮，尤比王莽篡漢後改外族為降奴服于下句麗之舉。以上嘅改變明顯唔係中港文化健康共存嘅情況，而係香港廣東話生活文化逐步被大陸文化取代嘅明顯警號，只要社會觸角未被大一統思維所麻木， 要發現哩啲改變然後加以警惕背後嘅權力操作，其實唔難。

更何況，一樣語言實用唔實用，唔係完全睇邊個多人用啲。用語言使用人數多寡來判定語言嘅實用性根本毫無客觀根據可言。大中華膠聲稱語言實用掛帥，實則感情用事，雙重標準。如果因為「普通話多人用」而唔介意棄用廣東話，咁港英管治時代，英美等大國皆用英語，自命中國人嘅「大中華膠」又點解唔根據「理性客觀」嘅現實，放棄中文做個假洋人，要「感情用事」繼續保留用中文呢？何況、如果用語言只係以佢實用唔實用來衡量，學《以畫為喻》話齋，用普通文字夠哂，文學同藝術畫一樣「不為實用」，點解唔按照實用嘅取捨標準放棄文學，摒棄小說戲曲詩詞歌賦等「唔實用」嘅中華文學？仲有，大中華膠強調學普通話有助寫作，實情係因為現代中文白話寫作手法完全係只以普通話（國語）作基準，而無視中文之中其他語言所致，如果五四運動嘅語文改革目的係要「我手寫我口」，咁就更加唔應該本末倒置咁要全香港改用普通話來遷就返跟北京話做標準嘅寫作思維。

再者，一樣語言，一樣文化，可唔可以繼續實用落去，好睇有冇子孫肯將個文化傳承落去。文化傳承，其實唔需要改變其他人去用你嘅生活習慣，甚至唔需要證明佢本身「實唔實用」，只需要用自己每一點每一滴嘅生活去守護，用自己嘅語言書寫自己嘅文字，而唔係西瓜靠大邊，或者為咗所謂要方便搵錢嘅理由，數典忘祖咁放棄自己嘅語言同文化去迎合其他人嘅言語習慣。

如今嘅粵普之爭、中港矛盾，話係香港人受壓逼搵人出氣，不如話係好多所謂精英同權貴，為咗一己私利，向北京表忠，又要方便自己收割香港人同大陸人嘅剩餘價值，不惜賤割香港嘅文化資產及市民生活嘅利益，棄之如草介，又邯鄲學步咁用大陸嘅文化來取代、磨平香港原有嘅語言文化特式，而引起今日嘅反彈。不過，土豪劣紳奸官庸吏之所以得到掩護，可以繼續作惡，正正係因為大陸文化取代香港文化唔單只對大中華敍述毫無沖突，中港融合嘅表像更乎合咗大中華膠潛意識入面「中華民族一家親」嘅完美想像而姑息歪風，轉而評擊反抗嘅人威脅大中華和諧局面。謝志峰為自己嘅立場辯解時，口口聲聲話自己明白香港嘅現狀，之但係睇真啲，中港矛盾嘅嘢，你識條春咩？