（特首辦外，6點50分。港視留守十子之一蔡錦荃 攝）

遮打革命到現時為止，一共守住三個據點。每個據點，地勢唔同，難題不一。綜觀多日資訊，無可否認旺角一點最為險要，戰情亦最為激烈。幸多得眾義士連日負隅頑抗，狼鷹爪牙多番文攻武鬥仍未失守，力保重要戰略籌碼。由於狼鷹爪牙為求目的，不擇手段，又得體制中人枉法徇私，滋事份子有持無恐，更無所不用其極，心理未有準備者有所顧慮，或未敢加入，亦令參與防守之朋友更顯勇武，亦使旺角一區得到更多關注。

誠然，死守旺角之眾勇士功不可沒。唯今次抗爭，乃係全民之事，而非全部人均可完全放下世俗凡務，於第一戰線奮戰退敵，只能司職防務後勤：據點防守範圍之大，無通訊兵發送資訊，眾戰士未必可以迅速反應配合；另戰事又因膠人誤事，拖延日久，如無運輸兵連日按據點所需運送水糧雜物，抗爭將有彈盡糧絶之虞。又，今次抗爭，仍係背水一戰，三個據點，失一不可。就算旺角戰況激烈，守備之勇士屢建奇功，大家亦莫要太過心高氣傲，過份褒揚旺角勇士，稱「守過旺角先係真男人」等言論，為旺角徒添光環，而使大眾忽略其他險要之重要，減少關注同支援，危及大局。

諸君須記，無論任一抗爭者於今次抗爭中扮演乜嘢角色，守邊一個據點，都一樣重要。每個上街抗爭之人，都係真心為真民主真普選出力之人；每一個據點，都係重要嘅談判籌碼。雖然唔係每位抗爭者，唔係每個據點都有同等份量，但係請大家記住：抗戰未完，每一個崗位都同樣要有人去當值，每一個據點都要有人守住，唔好一時鬆懈，或者貪功好戰，走去多人關注嘅地方「黏金糠」，令其他崗位嘅人力減少，打開其他據點被突擊清場嘅缺口。

後記：私底下同朋友都懷疑，今次抗爭，點解會拖到咁長？在下同唔同嘅人討論，發現唔少人都認為唔喺国慶入金紫荊廣場絶對係一大敗筆。聽講係有人（唔係警察）阻止群眾入場「怕落中共面怕人嬲」。心諗，唔通「遮打革命」唔夠落中共面？學散彈一號話齋，「人大常委關於香港普選嘅決定既然頒下，香港人反對，分明就係要將中共《一個完整的面子》整個拉下來。香港人爭取普選，有沒有付出一萬億嘅決心？」唔想付出，香港都付出咗最少3500億，點解唔付出埋剩低果6500億？又，十個去飲，九個都只係掛住去食乳豬飲魚翅，冇人記得係為咩去飲，點解係擇哩個吉日。淨係掛住食，家陣係「遮打革命」呀~毛主席都話「革命唔係請客食飯」呀~大家返去參透一下啦～