喺暑假回首今年教學嘅異象，係多咗英文仲叻過大人嘅小朋友，但中文水平不如理想。佢哋好多基本日常用詞都睇唔明、聽唔明、講唔出、寫唔出。近十年來，中文教育界爭議緊用普通話教學生，係咪真係咁有益。但我漸漸發覺一個現實，最有效嘅教學方式，竟然係喺粵語滲入少少英文，可以達到出奇不意嘅神效，我願稱之為「英教中」。
「英教中」好適合用嚟解釋抽象嘅概念或虛詞。舉兩個真實例子：升小五同學，解極都唔明「儘管……卻……」同「無論……，……也……」嘅分別，用廣東話去解釋，你要同佢講更抽象嘅詞語，例如「條件」、「詞性相反」，解咗兩分鐘佢都會皺晒眉頭，但用英文簡單兩個詞「Despite」、「No matter」就秒殺咗。中一學生，「改善」同「改正」唔識分，又係講「improve」同「correct」，一點就通。
當然，日校老師冇可能會咁教——用廣東話教中文已經愧對神州炎黃列祖，用英文豈不是勾結外國勢力，通番叛國？但我哋的確要承認一個事實，就係經歷疫情洗禮，新一代學童嘅中文水平已經斷崖式暴跌，教育界上至校長老師、下至家長以及補習姐姐，都無不要面對災情。
我哋好容易會慣性咁諉過香港家長，指責佢哋崇洋媚外，淨係掛住同小朋友講英文、逼佢哋睇英文書。但如果平心靜氣咁比較，會唔會其實日校嘅英文教育模式，真係好過中文呢？當英文老師用嘅教案係遊戲中學習，追求學生之間互動，內容又潮又實用，而中文教學仲喺到輪流讀課文，逐隻逐隻字解又一堂，係咪真係有啲落後呢？
以上係我嘅一管之見，我嘅小學生諗法就更加純粹。我問佢哋喺邊處學咁好英文，佢哋可以一輪嘴數出Harry Potter（或其他我聽唔明嘅）、Marvel漫畫、Barbie / Oppenheimer等一大堆電影名，甚或Youtube 都夠做。中文呢？到今時今日，我仲叫佢哋睇金庸、衛斯理？抑或有冇人可以話我知，睇邊個Youtuber可以提升中文水平？
咪以為本港教育局只係坐視不理，相反，佢哋仲打鑼打鼓咁推廣一大堆文言文。結果就係，有啲學生喺我面前輕易背出《孟母戒子》、《回鄉偶書》，但要佢哋寫一句通順嘅句子？寫唔到。要佢哋睇一篇普通嘅小說文章？睇唔明。
當然，教育局唔輪到我話事啦。學生每星期返30個鐘學，先至見到我1個鐘。我唯一可以做嘅，就係照用我嘅「英教中」，而且我會同小朋友講：「唔緊要嘅，我幫你應付咗呢個中文考試先。最緊要你要繼續睇多啲書，乜嘢語言都無所謂，只要你真係學到嘢，做人醒目啲，就已經好夠。」
———
Ken Sir，中文補習老師，教參書作者，教咗中文10年。
3 Comments
ɡruk skra̠
「差強人意」，根據國家教育研究院教育部成語典，本義是還真是能夠振奮人心，語出《東觀漢記‧卷八‧吳漢列傳》，後用「差強人意」比喻雖然不夠好，但大體上還能讓人滿意。「喺暑假回首今年教學嘅異象，係多咗英文仲叻過大人嘅小朋友，但中文水平差強人意。」所以你想說的是他們的中文水平大體上還能讓人滿意？
「升小五同學，解極都唔明『儘管……卻……』同『無論……，……也……』嘅分別，用廣東話去解釋，你要同佢講更抽象嘅詞語，例如『條件』、『詞性相反』，解咗兩分鐘佢都會皺晒眉頭，但用英文簡單兩個詞『Despite』、『No matter』就秒殺咗。」這位同學的情況，有沒有一種可能是他/她在英文課學「Despite」及「No matter」的時候，英語老師已用較抽象的詞語解釋？但我相信不少學生（包括我）也是透過中文學英文。可能這位同學他/她的英文水平較中文高？（這可能是因為他/她家有外傭？他/她跟外傭用英語交談的時間比用粤語、官話或其他漢語族語言跟父母交談的時間長？）
「中一學生，『改善』同『改正』唔識分，又係講『improve』同『correct』，一點就通。」根據《香港小學學習字詞表》，「改善」及「改正」均為第一學習階段的詞語，亦即是小朋友於小學一年級至三年級應要學習的詞語。一個中一學生還不能分辨「改善」及「改正」，很大機會是小學時根本沒有專心上課。然而，拿此等極端例子來談，似乎以偏概全了，我相信香港的小朋友不是全部都是這樣的。
而至於關於日校中英文的教育模式，在我所就讀的中小學，均沒有分別，並不存在用遊戲教英文的情況。雖然我不能以偏概全地說全港的日校英文課均不會用遊戲教學，但至少我能說不是所有學校都是如此。
關於如何提升語文水平，我認為母語的情況不能與非母語相提並論。中文考試比英文考試難（我認為中文考試考文言文就等同英文考試考莎士比亞等，因為兩者皆為古語言，然而英文考試並沒有考莎翁等），既然中文考試難度較高，就自然比較難用日常看 YouTube 等大眾娛樂來提升。
不過，Ken Sir 你為中文補習老師，接觸的學生難免是中文水平不太高的，所以出現這樣的觀點我亦覺得合理。我只是在發表我個人的觀點，若有不認同的人，歡迎留言；若有錯誤，歡迎指出錯處。本人為中文學渣，文筆不好，望見諒。
gongjyuhok
作者：多謝成語嘅賜正同其他意見分享，文章已修改
□∃xG(x)
喺暑假回首今年教學嘅異象，係多咗邏輯仲叻過大人嘅小朋友，但語言水平令人失望。佢哋好多基本日常用詞都睇唔明、聽唔明、講唔出、寫唔出。近十年來，語言教育界爭議緊教學生世界語，係咪真係咁有益。但我漸漸發覺一個現實，最有效嘅教學方式，竟然係喺語言滲入少少邏輯，可以達到出奇不意嘅神效，我願稱之為「邏輯語言論」。
「邏輯語言論」好適合用嚟解釋抽象嘅概念或虛詞。舉兩個真實例子：升小五同學，解極都唔明「……必需……」同「……必然……」嘅分別，用英文去解釋，你要同佢講同樣相似嘅詞語，例如「necessary」、「necessarily」，解咗兩分鐘佢都會皺晒眉頭，但用邏輯簡單兩句「D」、「S5」就秒殺咗。中一學生，「相信」同「知道」唔識分，又係講「KD45」同「S5」，一點就通。
當然，日校老師冇可能會咁教——學英文呢啲自然語言已經愧對神州炎黃列祖，用邏輯呢種形式語言豈不是勾結外星勢力，成爲人奸乃至球奸？但我哋的確要承認一個事實，就係經歷疫情洗禮，新一代學童嘅語言水平已經斷崖式暴跌，教育界上至校長老師、下至家長以及補習姐姐，都無不要面對災情。
我哋好容易會慣性咁諉過香港家長，指責佢哋崇洋媚外，淨係掛住同小朋友講邏輯、逼佢哋睇邏輯書。但如果平心靜氣咁比較，會唔會其實日校嘅邏輯教育模式，真係好過語言呢？當邏輯老師用嘅教案係遊戲（如 Ehrenfeucht–Fraïssé 遊戲、Banach–Mazur 遊戲等）中學習，追求學生之間互動，內容又潮又實用，而語言教學仲喺到輪流讀課文，逐隻逐隻字解又一堂，係咪真係有啲落後呢？
以上係我嘅一管之見，我嘅小學生諗法就更加純粹。我問佢哋喺邊處學咁好邏輯，佢哋可以一輪嘴數出 Principia Mathematica（或其他我聽唔明嘅）、弗雷格哲學漫畫、Gödel / The Three Passions of Bertrand Russell 等一大堆電影名，甚或 Youtube 都夠做。語言呢？到今時今日，我仲叫佢哋睇 Harry Potter、世說新語？抑或有冇人可以話我知，睇邊個Youtuber可以提升語言水平？
咪以為本港教育局只係坐視不理，相反，佢哋仲打鑼打鼓咁推廣一大堆記誦。結果就係，有啲學生喺我面前輕易背出孟子、孔子、莎士比亞等人的作品，但要佢哋寫一句通順嘅句子？寫唔到。要佢哋睇一篇普通嘅小說文章？睇唔明。
當然，教育局唔輪到我話事啦。學生每星期返30個鐘學，先至見到我1個鐘。我唯一可以做嘅，就係照用我嘅「邏輯語言論」，而且我會同小朋友講：「唔緊要嘅，我幫你應付咗呢個語言考試先。最緊要你要繼續睇多啲書，乜嘢自然語言都無所謂，只要你真係學到嘢，做人醒目啲，就已經好夠。」