#愛情 會令人嘅世界充滿喜悅同幸福，多愁善感嘅畢加索當然都唔例外。佢1904年定居 #巴黎，認識到 #模特兒 Fernande Olivier，翌年共賦同居，慢慢走出好友自殺所引發嘅 #藍色時期 陰霾，多咗用柔和淺淡嘅紅、橙、大地色調。

畢加索喺巴黎 #蒙馬特 嘅工作室靠近一個 #馬戲團，提供咗好多靈感，所以呢個時期不乏以馬戲藝人為主角嘅畫作，〈賣藝人家〉（左圖）就係其中之一，有人話着住菱形圖案嘅滑稽角色演員係畢加索嘅 #自畫像，而其他人物就係佢啲 #藝術家、#詩人 朋友。

雖然話係玫瑰或者粉色時期，但畢加索其實冇乜點擺脫到之前用慣嘅 #藍色，好多作品似乎處於一個由藍至粉嘅過渡期，例子有兩幅1905年畫成嘅歷史高價 #名畫〈花籃女孩〉（中圖）同〈煙斗男孩〉（右圖）。無獨有偶，兩幅畫表達嘅都係童年到成熟、清白到有經歷嘅過渡：花卉象徵聖餐禮裏面耶穌嘅血，裸體同煙斗就係紙醉金迷成人社會嘅代表。從另一個角度演繹，女仔白皙嘅肌膚象徵純潔童貞，鮮豔嘅花卉代表激情紛雜嘅色慾世界。

欣賞呢個時期嘅畢加索畫作，可以特別注意硬筆繪畫、勾勒物體輪廓嘅筆跡，以及一啲 #古典主義 傾向，譬如係人物淡泊拘謹嘅情感、大致合理嘅形體比例、精心安排嘅模特兒姿勢、相對簡約嘅用色等等。但係同一時間，畫家多咗描畫人物90度正側面，似乎係受埃及圖文影響，可能係之後 #黑色時期 嘅前奏。

如果鍾意呢篇文，請你CLS支持 
此系列逢星期三、星期日更新，敬請大大力追post :0)

相關文章：
El Greco畫作導賞：畢加索筆下的葬禮 https://www.facebook.com/JudyLeeLi…/posts/1270259766731849
#畢加索：藍色時期 (1901-1904)
https://www.facebook.com/JudyLeeLi…/posts/1337569253334233