西班牙南岸販毒猖獗，當然引起「#加強執法」，不過財雄勢大嘅 #犯罪集團 又點會冇變通嘅準備？好多犯罪集團雖然傳統上紮根南部，但係亦都識得利用擁有東岸販毒基建嘅當地組織去轉移業務、分散風險。#華倫西亞、#Murcia [1] 呢啲地方，海岸線長，港口大，遊客、外國居民眾多，係非常好嘅掩護；同時，西班牙東面呢啲城市同港口位處地中海西岸，無論對國內定歐洲其他地方，交通都夠晒方便，係運輸同散貨嘅絕佳據點。據執法部門紀錄，Murcia地區原先每年只係截到三四隻毒船，2020年就有13隻，相信就係南部踢竇踢咗去東部嘅證明。

循呢個途徑入嚟嘅毒品主要有北非 #摩洛哥 出產嘅 #大麻樹脂，以及嚟自 #拉丁美洲 嘅可卡因。前者可能由於語言嘅關係，主要由法國黑幫把持；貨物一到Murcia同Almería（中譯「阿爾梅里亞」）海灘邊，就有私家車接走，直送法國。#可卡因 就混入生果同其他產品嘅貨櫃，大批大批噉入境。2019年，華倫西亞破獲嘅可卡因總量大概係3,000公斤，但2020年6月單一次行動就已經搜到4,000公斤，收埋喺巴拿馬同 #哥倫比亞 入口嘅糖同菠蘿果肉裏面，由持有港口出入許可嘅本地貨車司機負責運輸。Murcia方面，2019年搜獲149公斤可卡因，比之前一年嘅數字上升超過六倍。

面對噉樣嘅情況，執法人員都慨嘆「道高一尺，魔高一丈」，有國民警衞人員向報館表示：「有組織犯罪一路進步，同時人手一路增加緊，但我哋就20年不變，甚至更差。」西班牙四通八達嘅地理位置，仲有陽光海灘美食嘅廉價高質生活，引嚟唔少 #跨國犯罪 組織進駐，大家估下咩人有份割據？下次開估。

[1] 中譯「梅西亞」、「莫西亞」或「莫夕亞」

文中外語為 #西班牙文
如果鍾意呢篇文，請你CLS支持 
逢星期三、星期日更新，敬請大大力追post :0)

相關文章
來上一課西班牙地理（二）：科學解釋炎熱的GOT場景 https://www.facebook.com/JudyLeeLi…/posts/1187090721715421
#地緣販毒學：遊客忽略的西班牙風貌（一）至（三）
https://www.facebook.com/JudyLeeLi…/posts/1459223251168832
https://www.facebook.com/JudyLeeLi…/posts/1461979470893210
https://www.facebook.com/JudyLeeLi…/posts/1463841997373624