澳洲政府今日朝早宣佈咗一系列嘅移民制度改革,希望提高移民門檻同新移民質素,不過呢個改動令好多諗住讀書移嘅香港人大失預算,因為改革其中一樣,就係突然將畢業生簽證嘅申請年齡上限從50歲降至35歲。
好多香港人,尤其係36至50歲之間嘅人,原本計劃帶埋家庭去澳洲讀書,然後取得「485簽證」後再申請永久居留。但而家政策改變,佢哋突然發現自己超咗新嘅年齡上限,冇辦法再透過hong kong stream來移民。讀完書可能無法喺澳洲留低。
澳洲政府仲提高咗留學申請嘅門檻,包括英文要求從IELTS 6.0升到6.5,同埋限制咗485簽證持有人轉返學生簽證500。即係話,拎咗畢業生簽證,再讀書繼續留喺澳洲都可能有困難。
呢啲改革措施都係澳洲聯邦政府為咗減少整體移民數量,修復「千瘡百孔」嘅移民制度。政府希望透過嚴格審查留學生同埋打擊剝削勞工嘅僱主,來改善移民質量。
呢個改革計劃喺2024年中實行。當然,喺當地嘅香港人都會極力爭取豁免Hong Kong Stream嘅年齡限制,而澳洲政府亦預告會有新嘅移民途徑,今次是福是禍,都要再睇之後澳洲政府嘅公佈。