最近，我喺海牙出席「想像國：流亡香港」研討會（ImagiNation: Hong Kong in exile 2024)，向國際學者同其他民族領袖作供，力陳香港話點受港共壓迫。轉個L頭，香港嘅所謂「粵語學者」就喺將「抵抗匪語=文化獵巫論」散播到台灣，幫香港話運動倒米。
佢哋唔係第一年苟噏（9up），而且虛有學者之名，缺乏科學理論，只係渲染香港話運動嘅字眼妖魔化成「獵巫」。我哋首先要叩問：個人／民間對共產黨語言工程「匪語」嘅有意識抵抗，同中世紀政權借獵巫之名清洗異己嘅政治行動可以類比？如果雞蛋唔等於高牆，點解要咁輕率去散播一個偽科學嘅術語，為港共嘅語言清洗工程背書？我真係睇唔透。
我希望所有從事香港話研究嘅朋友，都必先細讀《1984》作者George Orwell嘅文章Politics and the English Language，感受Orwell如何痛心英國嘅犬儒為英文嘅敗壞背書。我哋不妨先一齊開個靚頭。
George Orwell: Most people who bother with the matter at all would admit that the English language is in a bad way, but it is generally assumed that we cannot by conscious action do anything about it. Our civilization is decadent and our language – so the argument runs – must inevitably share in the general collapse. It follows that any struggle against the abuse of language is a sentimental archaism, like preferring candles to electric light or hansom cabs to aeroplanes. Underneath this lies the half-conscious belief that language is a natural growth and not an instrument which we shape for our own purposes.
Now, it is clear that the decline of a language must ultimately have political and economic causes…
（港譯：多數關心嘅人都會承認英文行緊條衰路，但普遍先入為主以為，我哋唔可以有意咁做任何嘢幫到佢。我哋嘅文明敗壞，而我哋嘅語言 – 個論述係咁講 – 都會無可避免咁衰埋一份，跟住就話反抗呢啲濫言濫語都係無謂嘥氣，好似唔用電燈偏要用蠟燭，或者唔搭飛機偏要坐馬車。背後埋藏住半意識嘅信仰，以為語言識自然生長，而唔係我哋可以為咗各樣目的而塑造形狀嘅工具。
而家，擺明嘅係一隻語言嘅衰落，歸根究底一定有佢嘅政治同經濟原因……）
Orwell嘅文章值得細讀，因為佢唔止批判呢班犬儒，仲提出咗拯救語言嘅6種方法，我喺呢到唔一一細數，留返機會俾大家閱讀。我只講其中一樣：Orwell就係敬告大家唔好用一啲不知所云嘅比喻同成語，咁啱本文講嘅「文化獵巫」，就係香港話中一個完美嘅反面例子……
不過話分兩頭，「獵巫」呢個色彩濃厚嘅字詞，又都畀咗我一啲啟發。喺我嘅語文教學經歷中，我成日同啲小朋友講，你完全可以Disrespect「中國語文」呢一科，因為呢科用嘅範文、教學方式，完全係填滿政治意圖嘅垃圾，唔鍾意呢科係人之常情。But, Hey Kids，你唔可以放棄語文，因為語言文字係magic、係魔法，你可以用語言去操縱人哋，但我嘅門生，你要記住，一個唔為意，你就會俾人哋嘅語言操弄你。
呢啲唔係魔法係咩？我而家寫「粉紅色大笨象」，你腦入面有乜畫面？一句「凍冰冰」，一句「熱辣辣」，用音速去擊中聽者嘅大腦，現代啲固然可以稱為「大腦神經科學」，但我哋無可否認，語言本身係具有無意識咁影響他人嘅魔力。
正如一句甜言可以換來激烈嘅性愛，一個數字可以喚起大屠殺嘅記憶，一句口號可以引發百萬人嘅革命——以致當權者要帶住槍去搜捕我哋呢啲寫字嘅人，因為佢哋嘅語言比唔上我哋嘅語言，佢哋嘅魔法比唔上我哋嘅魔法，佢哋費盡唇舌嘅各樣口號（eg.由治及興），係幾咁拙劣可笑，佢哋必須陀槍去backup，喺學校逼迫小朋友，喺傳媒做覆讀機，先令到佢哋荒誕嘅言論稍為存留喺社會，污染大眾嘅視聽。
所以乜嘢係「獵巫」？共產黨嘅語言清洗工程，先至係人類史上最大規模嘅獵巫行動，只係披住現代科學嘅外衣。呢到我用「獵巫」一詞唔再係比喻，而係具有人類學嘅意義。你會見到佢千方百計暴力威壓，令蒙古嘅薩滿、西藏嘅僧侶、維吾爾嘅長老都失去佢哋嘅語言，失去佢哋嘅信仰，失去佢哋嘅魔法，取而代之嘅係類近《1984》威權專用嘅Newspeak、所謂嘅「普通話」，去混亂人民嘅大腦思想，從而實現佢嘅極權統治。
因此，最後我哋嘅出路就係巫師嘅自覺。事實上，世上的確有「文化獵巫」，而每一個唔係講Newspeak嘅人，喺極權者眼中都係一個個妖巫。佢哋要禁絕我哋嘅香港話，將所有同真相有關嘅詞彙，貶斥成到邪惡咒語咁。但怕咩喎，我哋正正就要將詛咒變成力量。
首先，要解除過往所謂教育，加喺我哋身上封印同詛咒，坦然接受我哋人人都係巫師／祭司嘅真相，相信我哋有權利、有能力創造出自己嘅語言同文字！然後，確立我哋嘅語文，即香港話，我哋就更加放膽靜靜地話，偷偷地講，甚至高聲疾呼，四圍歌唱！要相信我哋就係我哋嘅想像，而步槍最後都敵唔過言語中嘅真相！