作者：黃震遐醫生

（標題為編者所加）

華人文化長期以來，科學精神貧乏，科技落後。即使今世，主要科學理論及科技突破都無一並非來自西方。如果關心，就必須要再三思考，問題出喺邊度。

幾年前已經有位美國大學數學教授呻佢小時喺某北京重點中學讀書時，學數學，如果係x乘y=z ，就唔准寫成y乘x=z，否則會扣分。

見到今日楊穎宇喺臉書貼文討論兩例香港教育界現象。一例係小朋友敍事句作文，圖中，山腳下有隻牛。小朋友寫：小牛在山下，完全正確。但老師扣佢兩分，原因係：「在」字、同句點， “筆劃及比例不符標準”。另一例係算珠圖上要求繪畫出76345。小朋友完全做啱。但係被老師打大交叉，並且卷上打電子印一行：“算珠之間沒有空隙”。

珠算案例我未見過，但作文因為寫字不夠端正，例如子字下端少咗勾，而被扣分就不止一次見過。

兩個例子都一樣，教師評分時，搬龍門。敍事句作文，扣你寫字唔夠好，珠算考你悉唔悉表達萬位，就扣你珠之間唔應該有空隙。

當然，寫字要筆畫正確，比例啱。珠之間有空隙，喺珠算上另有意思。但幾大空隙始算空隙？如果劃到兩珠黏埋固然冇問題，如果兩珠線條重疊，又需唔需要扣分？間 0. 1mm 空隙算唔算隙要扣分？實在都可以考起人。

於是學生只能夠從細學悉做人規矩，一切都要聽上面發落，上面話你啱就啱，上面話你錯，即使你啱，都係錯。龍門由佢定。不要以為你見到嘅龍門就係龍門。於是，唯有係做忠心奴才，不要多想。樣樣都跟到十足。作文唔要花心機寫精彩文章，而係要寫靚字，求其合標準文章內容就夠。計數唔需要可以珠算悉到億位。能到老師要求，而粒粒珠都劃得靚就得。千祈唔好以為你可以珠算計到兆億，劃錯珠仔就冇事。

但係見樹計草太多，會唔會見唔到林？過於對細節要求完滿，會唔會睇唔到成個圖案嘅佈局？只係專注一子之勝負，會唔會忘記全盤嘅走勢？

其實，如果想乘機會提點學生，要留意字嘅筆畫，老師大可以按敍事句作文要求評分，畀足分，但喺卷上指出字形問題，要求注意。同樣，喺珠算教學上，根據計算而畀分，但對珠之間有冇適當空隙問題另外加上評論。換言之，不改龍門，但補加意見。

華人文化長期以來，科學精神貧乏，科技落後，同教育界行為有冇關係，值得大家諗吓。