作者：黃震遐醫生

（標題為編者所加）

大陸地區舊年12月七號突然頒布「新十條」，並結朿嚴控新冠病毒嘅清零政策。今年一月十四日，中國國家衛生健康委員會醫政司司長招開記者會，透露放棄清零一個月後，中華人民共和國共記錄了5萬9,938例與新冠肺炎相關的死亡病例。二月十八日，人民日報刊登文章宣布“取得疫情防控重大決定性勝利，創造了人類文明史上人口大國成功走出疫情大流行的奇跡”。

雖然官方數字表示大陸地區死於新冠人數，創下全球最低死亡率記錄，醫務人員都持續擔憂突然放棄清零後，大陸可能曾有高於冇疫情時嘅額外死亡人數。

近日，幾位華裔帶領下研究人員用咗别别出心裁方法推算出放棄清零政策後兩個月內，大陸地區30歲以上人口中嘅額外死亡人數，範圍應該係187萬人(95% 置信區間71萬-443萬)，即每十萬人中死133人。

研究人員用嘅方法係參考北京大學、清華大學、及哈爾濱工業大學嘅職工訃文。一向以來，三間大學都會在任何在職或退休員工死後三日內公布死訊，因此可以提供實時資料，並且比較不同時期嘅死亡數據。在此之外，研究人員分析咗百度搜索網站各省、直轄市、自治區對「火葬」、「土葬」、「火葬場」、及「殯儀館」嘅搜索頻率。

2022年12月，及2023年1月時，三間大學死亡人數都比之前幾年同期為高。北京兩間大學死亡人數高於過往同期403%、及56%。八成死者為85歲以上男土。而在此兩個月內，百度網頁搜索「火葬」、「土葬」、「火葬場」、及「殯儀館」嘅次數亦突然大幅飆升。研究人員根據上述關聯資料設立統計分析，認為除西藏之外，各省市自治區都有高於平時嘅額外死亡。

計算出來嘅數字，基本上同幾組不同研究人員結論相同。先前已有推測出130-210萬、167萬、及99萬額外死亡人數。

額外死亡人數死因可以包括直接死於新冠病毒，新冠病毒觸發慢性病死亡，或因為疫情而無法獲取得到適當醫護照顧所造成嘅死亡。無論係邊樣原因，結果都顯示在突然放棄清零政策後，大陸地區出現咗絕不尋常嘅極高死亡人數。官方所公布數字明顯過於樂觀。“成功走出疫情大流行的奇跡”明顯根本從不存在。

在知道呢個沉痛消息後，希望大家可以清晰檢討下究竟呢啲額外死亡人數係唔係真嘅無可避免？重係有人為錯誤？政策失當？

事實與當初公布數字之巨大分別，係唔係有人故意隱瞞？

只有認真面對問題，我哋始可以避免重蹈覆轍。

只有認真面對問題，我哋始可以避免再一次龐大嘅死亡人數。

Hong Xiao,; Zhicheng Wang, Fang Liu,; et al Excess All-Cause Mortality in China After Ending the Zero COVID Policy JAMA Netw Open. 2023;6(8):e2330877. doi:10.1001