作者：黃震遐醫生

（標題為編者所加）

今次會考放榜，最值得慶祝嘅當然唔係年年都會出現嘅狀元。

要大書特書嘅係：

9歲時確診杜興氏肌肉營養不良症嘅楊樂天同學，病情惡化到要長期坐輪椅代步，全身盡返得頭同手指可以迶動。但係楊同學冇放棄，靠食指同母指夾住筆寫字，考出咗五科18分。 相信大家都會祈禱祈福楊同學可以圓夢，進入大學讀市場科。

點樣可以幫杜興氏肌肉營養不良症病友手部靈活迶動，研究目前仍然主要靠收錄肌肉電波來控制穿戴嘅甲套。但多年來進展緩慢。近年來，脊髓損傷後用收錄大腦電波來控制動作反而成績可觀。暫時未知相關研究者有冇移師進攻採用呢種方法來解決楊同學及其他肌肉營養不良症嘅寫作及其他手指細緻動作困擾。

由於醫療改善愈來愈多杜興氏肌肉營養不良症會似楊樂天同學咁，成長而要面對成人生活挑戰。但目前醫學界同社會福利界都仍未有做好措施。

另一位要恭喜嘅係陳荃蔚同學，左腦腦出血後，遺落右邊事物䑃朧唔清楚，記憶差咗同右手不時會麻痺。今次得到25分。希望佢日後可以喺佢心愛嘅編程工作上能夠發揮才華。

兒童及青少年中風病友比較少，因此，針對佢哋嘅需要，目前研究及措施都難言滿意。

如果檢討中風後工作就業嘅協助，好明顯全世界都仍然相當落後，冇乜單位做緊研究。但係呢方面需要確係非常之大。

唔知病友組織或腦科基金，中風基金，可否邀請兩位同學同今次幾位想讀醫科嘅狀元見下面？可能可以激發幾位未來醫科生日後新導向來解決或復康病友日常困境。亦可能可以喚起大家對年輕病友讀書、就業生計問題，更大關注。