作者：黃震遐醫生

（標題為編者所加）

5月時，曾經貼過文問，打針醫得好認知障礙症？

當時只得藥廠發表新聞稿，話單株抗體Donanemab對醫治阿滋海默症型認知障礙症明顯有益。

沉日英、美、瑞典研究員終於正式刊登論文及數據。詳細消息有好有壞。結果並非如藥廠所說，咁出色。但同之前另外兩隻單株抗體一樣，進一步證實，減少腦內澱粉樣蛋白，有助抵抗阿滋海默症型認知障礙症。因此，說明治療認知障礙症的新時代的確已經降臨。文章刊出時，亦罕見同時刊登四篇社論，足見激發起腦科專家極度關注。

參加隨機試驗嘅病友限於60-85歲，輕微認知障礙、及輕微阿滋海默症型認知障礙症病友。76星期後，1736名參加者中，每四星期注射一次Donanemab嘅病友，同注射佯藥劑嘅病友比較起來，多項檢查都顯著勝出。注射藥後，76%病友可以全部清除哂腦內澱粉樣蛋白。低至中度濤蛋白積累量病友病情惡化減少35%。但腦內如果已經積累甚多濤蛋白病友臨床改善就非常有限。

即使其他病友，改善實質上都係有限，以所用嘅檢查表CDR-SR算，只係18分中，0.7分差别。但低或中度濤蛋白積累量病友，注射藥嘅病友47%一年內病情穩定，冇惡化，而佯藥組就只得29%冇惡化。換言之，減少澱粉樣蛋白，可以為病友爭取時間，但仍未見得解決問題。正如我之前貼文解釋，澱粉樣蛋白只係上游中介，作用係招來真正殺手濤蛋白。因此，如果想獲益，一定係愈早開始治療愈好。

但係目前所見嘅三隻單株抗體，都有嚴重副作用，不可忽略。腦掃描顯示Donanemab引發31%腦內微出血，24%腦水腫。三名病友更因此死亡。另外一個不可忽視問題係，Donanemab雖然減少同認知障礙症記憶退有關嘅海馬區萎縮，成個腦縮小情況卻比佯藥組犀利。

睇來，我哋已經進入咗一個新時代。

更多針對澱粉樣蛋白及濤蛋白嘅治療方法相信會陸續出現。效果及安全性亦必然會改善。

但對大家來講，預防仍然係最安全及證實有效方法。有效治療至少五到十年內，相信都必然帶有嚴重副作用風險。

而目前治療方法都只係防止惡化，無法掉轉時鐘，令人收回所已失去。因此一覺得自己記憶或認知有問題，即使輕微都應該盡早就醫，求治。千祈唔好拖延。鎖門防盜佳。有賊入屋就要報警。等到殺手都光臨，就厄運難逃。正如醫治中風，要同時間競跑，醫治認知障礙症亦一樣。時間係腦細胞。

Sims JR, Zimmer JA, Evans CD, et al. Donanemab in Early Symptomatic Alzheimer Disease: The TRAILBLAZER-ALZ 2 Randomized Clinical Trial. JAMA. Published online July 17, 2023. doi:10.1001/jama.2023.13239