澳洲獨立參議員Lidia Thorpe早前宣誓效忠英女皇時，自稱向英女皇嘅「毛髮」（hairs）效忠，而唔係「繼承人」（heirs），一出聲即刻引發澳洲政壇嘅爭議。佢仲話身為原住民係專登咁做，目的係要諷刺英國王室。聯邦反對黨聯盟就相當不滿，會研究法律上挑戰Thorpe嘅議會資格。而最新澳洲參議院秘書就話，程序上唔會再特登測試個議員係咪真心宣誓，而Thorpe又有個正經嘅書面誓詞，所以誓言仍然有效。

除咗宣誓事件，Thorpe之前喺英國查爾斯國王訪澳嗰陣高調抗議，話佢係「種族滅絕者」，並要求將澳洲原住民土地歸還。佢喺國會大廳大叫「你唔係我哋嘅國王！」（”You are not our king!”）同埋「呢度唔係你嘅土地！」（”This is not your land!”），俾保安帶走嗰時仲大叫：「屌你個殖民地！」（”F**k the colony!”），亦都引起廣泛爭議。

對於呢件事，澳洲參議院秘書Richard Pye表示，雖然Thorpe嘅言行比較異常，但佢已經按程序完成書面同口頭宣誓，技術上無違規，因此其資格無受到影響。Pye仲強調，澳洲係冇對宣誓嘅誠信度進行測試嘅。

議會宣誓喺世界各地都係屢見不鮮嘅抗爭手法。不過喺2016年嘅香港，多名民主派同本土派立法會議員因為喺宣誓時表達自己嘅政治立場，即刻被DQ。當時，梁頌恆同游蕙禎等議員喺宣誓過程中，將誓詞中嘅「China」讀做「Chi-na（類似支那）」，並且辯稱係口音問題，結果俾秘書處強行取消議員資格。雖然佢哋上訴到終審法院，申辯法例上秘書處冇權咁樣DQ，但喺終審法院判決之前，人大常委會就釋法，加插「宣誓人故意宣讀與法定誓言不一致的誓言，或者以任何不真誠、不莊重的方式宣誓，也屬於拒絕宣誓，所作宣誓無效」嘅內容，令梁游最終敗訴。

#konghub #澳洲政治 #原住民權益 #宣誓爭議 #英國王室 #澳洲參議院 #澳洲原住民 #獨立參議員 #抗議行動 #議會宣誓 #殖民地歷史 #香港宣誓DQ #香港政治 #民主運動 #中澳關係 #言論自由 #人權問題 #文化衝突 #法例釋義 #議會抗爭