前日香港電台記者利君雅喺記者會上，憑流利廣東話連番質問特首林鄭月娥「噚晚你瞓唔瞓得著」，被公眾推崇封為新聞女神。原來巴基斯坦裔嘅佢曾經講過，廣東話先係佢嘅母語，比佢講家鄉話更加流利。
利君雅接受本地主流教育，一直用廣東話學習。雖然父母廣東話唔流利，佢都靠住每日喺電視機前學好中文，更喺會考奪A。佢喺浸大廣播新聞系畢業後，先後做過nowTV、無綫新聞同明報記者，而家就喺香港電台擔任香港電台《視點31》主持節目。2010年，佢代表關注少數族裔嘅融樂會喺立法會發言，認為應該將「監察政府、維護公眾利益及宣揚社會公義」訂於新香港電台約章。
融樂會研究指出「普教中」會令少數族裔學生喪失唯一學習廣東話嘅機會。香港一直都缺乏正式畀少數族裔嘅廣東話教育，好似利君雅咁學到流利廣東話，更加係鳳毛鱗角。融樂會建議政府唔應該再延長「普教中」，而係將資源用於加強非華語生嘅中文同粵語教育。