年三十晚，法國總統馬克龍喺社交網站用法文、韓文、中文同越南文賀年，佢寫話：「向所有慶祝農曆新年的人們致以我最美好的祝願，祝願大家健康、成功、幸福！」

呢份「最美好嘅祝願」用埋簡體字寫，但大陸人就唔多領情。「＃馬克龍用四國語言拜年＃」變咗大陸社交網站熱話，好多網民都怒鬧馬克龍別有用心，刻意稱呼「中国新年（Chinese New Year ）」做「農曆新年（Lunar New Year）」，而且用埋四國文字，係助長其他國家「文化剽竊」，溝淡新年嘅中國色彩。

有人質疑馬克龍故意混淆視聽，更加有人怒鬧各國新年都係「由中國爹傳過去」，而家偷取中國文化「來裝自己歷史悠久」。

據研究，韓國嘅新年可以追溯到三國時代嘅新羅國，《隋書》同《唐書》記載咗新羅人喺正月初一會互相慶賀，拜祭月神同太陽神。而身置於漢字文代圈嘅越南，農曆新年亦都係一年最重要嘅節日。

各國近年以Lunar New Year取代Chinese New Year

雖然大陸網民怨聲四起，但各國家近年都真係開始用「Lunar New Year（農曆新年）」取代「Chinese New Year （中國新年）」。最近仲有韓國民間團體成功爭取Google唔好再自動「更正」Lunar New Year嘅搜尋結果同埋置頂「中國新年」嘅內容。

以前喺Google上搜索「Lunar New Year」，搜尋會自動顯示「Chinese New Year」嘅結果，韓國民間團體「韓國之友」（VANK）發現後，由2019年起不斷用電郵向Google抗議，認為唔尊重其他國家嘅傳統文化，亦不利於維護世界和平。

至今終於得到Google回應，搜尋「Lunar New Year」時只會出返農曆新年嘅結果，同埋唔會再彈出「中國新年」嘅內容。

澳洲最大城市雪梨喺2019年曾正式宣布，改稱「Chinese New Year」更名「Lunar New Year」，希望多年來圍繞中國、越南、韓國嘅節日名稱爭論可以結束。

不過，隨住各國道賀「農曆新年」嘅呼聲不絕，相信呢啲爭論都會繼續落去。