香港浸會大學舉行2021年校友日「浸大靚景打卡至吸『like』相片比賽」，落晒廣告吸引校友參加，但就唔多受校友歡迎，留言批評學校封鎖校園唔俾校友入，而且活動得獎者先得$100禮券，甚為小氣。

浸大官方專頁「HKBU Alumni」話，比賽邀請到2020國際年度風景攝影師大賽全球冠軍袁斯樂校友擔任比賽嘅名譽顧問，經佢一輪篩選啲靚相，再喺Facebook鬥多like者贏。浸大補充話，不論現時或昔日拍攝靚相，抑或係電腦合成照都無任歡迎。於投票時段內獲得最多「like」嘅10張相片將會贏得HK$100禮劵各一張。

但係校友就紛紛留言批評比賽難度又高，獎金又少。「入到去？咪玩啦」「hkbu學生都未必入得到去」「校友回不去，保安不讓進！」「公關災難，點入去影呀」

事關經過2019年反送中差佬同學生喺各大院校打仗之後，浸大上年1月開始禁止公眾進入，校方喺學校所有出入口設置閘機，要求同學及教職員拍卡出入，而校友冇收到校內人士邀請都唔俾走入去，變相校友要影畢業相都只能夠喺學校門口影，諸多不便。

今年畢業嘅「浸大山神」就恥笑浸大又閂閘又叫校友返去影相，做法離地：「喺浸大搵靚景呢啲咁高難度嘅活動都俾你諗得出，而且乜而家校友入到去影相咩？攞景定係贈慶！」

而家香港各間院校好似理大、城大同埋中大等都陸續安裝閘機，阻止公眾人士入內。

#浸大 #浸會大學 #攝影比賽 #大學生 #重門深鎖 #校友 #浸大校友 #浸大山神 #港語學