一名外籍工程師入稟區域法院，指前東家禮頓建築（亞洲）涉嫌種族歧視而將佢解僱，行為包括工作時被貶稱佢做「鬼佬」，並且將佢架空，申索人要求禮頓賠償並道歉。案件噚日（8號）喺區域法院開審。禮頓個上司出庭作供時話，佢唔記得有冇叫過工程師做「鬼佬」，但認為係慣用叫法，「好少用『外國人』稱呼外國人咁突兀」。
申索人為Haden Francis William，16年起參與禮頓同中國建築工程（香港）有限公司聯營嘅將軍澳藍田隧道爆破工程中，佢就擔任爆破經理。佢話工程期間遭到歧視，喺17年2月向禮頓投訴，之後就被中止合約。Haden又話，17年1月到2月休假期間，公司2月開會冇畀電郵佢，又冇出席佢去會議，即係上司兜過佢，仲趁佢唔覺意指示佢啲下屬做代表出席會議。
禮頓辯方就話，Haden都曾經喺電郵群組剔除兩個同事，Haden又不了解事項又唔幫下屬，係不負責任，而種族歧視嘅講法只係Haden估估下。Haden就認為因為唔係中國人先俾人杯葛。
佢姓黎嘅上司作供就話，地盤無時無刻都運作緊，冇必要等Haden放假先處理，而且最終都係會搵申索人負責同簽署核實。黎生又指，佢唔記得有冇聽過同事或者自己叫佢做「鬼佬」，但佢認為這「鬼佬」只係常用口語，合作開嘅外國人都會咁叫，「少用『外國人』稱呼外國人咁突兀」，亦都唔覺得叫人「鬼佬」會分化中國人同外國人。佢又話Haden當時都冇向管理層投訴。
呢單案今日都會繼續審理。
#鬼佬 #種族歧視 #廣東話 #禮貌 #禮頓 #歧視 #外國人 #工程師 #港語學