最近喺社交網站廣傳一條順德煲芝麻糊阿婆片，入邊阿婆對講述經營芝麻糊生意嘅時候，將粗口「鳩」字運用得出神入化，化入句子好似行雲水咁流暢，令後生一輩驚為天人。港語學主席陳樂行就話，其實講粗口對於老人家嚟講都好普遍，而「鳩」呢個字嘅本意，甚至係而家中學人人都要學、好文雅嘅文言文字……

片段中，阿婆唔係粗口鬧人，而係喺描述自己煮芝麻糊過程入面唔落糖精，「無話正唔正宗，唔食就『鳩就（罷就）』啦」，令到網民感到好親切同誠懇。不過，同時都牽起咗一個討論：個「鳩」字本身到底係咩意思呢？點解個阿婆可以咁樣狂用？

有網民就援用香港才子黃霑嘅講法：「柒是大而軟的， 故稱大而無當，不靈不活者曰笨柒。鳩是大而硬的，不應為而為，不應硬而硬者，叫戇鳩。」不過，研究廣東話粗口多年、港語學主席陳樂行就對呢種講法「不敢鳩（苟）同。」

「黃霑對香港文化影響固然深遠，但佢提出呢種觀點嘅同時，係無任何文獻支持。」陳樂行與此同時提出另一個觀點，認為「鳩」字係同一個古代口語嘅常用字有關。

「我認為，個『鳩』字其實係不敢『苟』同個『苟』字嘅變音。」陳樂行指出，「苟」字有隨意、唔慎重嘅意思，例如「苟言苟語」、「苟同」、「苟且偷生」，係古人經常加喺動詞之前嘅副詞，本身並無性器官嘅意思。「孟子話『故不為苟得也』，你用廣東話講『所以唔可以鳩攞』，意思係一樣。孔子讚衛公子荊識理財，引述佢對於自己嘅財富話『苟合』、『苟完』、『苟美』，即係容易滿足，同順德阿婆都有異曲同工之妙。」

「不過，語言係約定俗成嘅，當講廣東話都認同『苟』字讀高音係同陽具有關係，咁聽嘅同講嘅當然都係有呢個意思啦。」至於「鳩」點解係陽具，佢就引述咗幾種講法，例如有人話係將雀鳥比喻成陽具，亦都有人話係尾龍骨「尻」字嘅引申義。

#鳩 #粗口 #香港粗口 #廣東話粗口 #廣東話文化 #文言文 #港語學