新一年嘅早晨，打開電視，開正是旦台播緊前一晚，即係除夕晚嘅新聞。新聞咁啱就報導緊跨年夜晚嘅尖東海旁，有市民以卡通人物打扮，為其他人提供「免費擁抱」。

「免費擁抱」？？？

真係睇到眼都凸。講到好似原來擁抱係要俾錢買咁。

不過上網翻查一下，原來香港同台灣，free hug都係意會做「免費擁抱」。即係咁，我真係好驚訝。唔通free hug過後，相擁有價？

對於free hug哩個活動，本人雖然唔多參與。不過在下都懇請大家，就算中華文化對陌生人街頭相擁之事顯得格外區拘緊，但係請唔好俾有色眼鏡遮擋我地嘅視線，只係睇到free hug 「免費」嘅一面。哩一面嘅意會，不但只唔完全，仲會顯得成個社會嘅文化對人際互動嘅見解非常膚淺鄙陋。

當初Juan Mann發起free hug，唔係想有人得到「免費被抱」嘅服務。佢嘅目的只係想用一個隨意嘅善舉(random act of kindness)，用擁抱來俾相擁嘅人都感受到關懷。響茫茫人海中互相擁抱，對大家來講都係一種緣份。Free hug嘅活動入面，無論係舉牌去「提供」擁抱嘅人，定係走埋去以擁抱回應舉牌者嘅人，可以係任何人：高嘅、矮嘅、肥嘅、瘦嘅，等等。參與Free hug活動中擁抱嘅人，彼此地位對等，相擁都係出於自由選擇：前者選擇主動向其他人展現善意，後者選擇對善意作出友善嘅回應。事實上，個活動唔係「免費」，係雙方都要為方選擇付出，放低平時用來保護自己嘅冷漠，將一個素未某面嘅人擁抱入懷，以實際嘅身體行動表達對彼此尊重，互相支持。

麻煩大家認真思考一下，其實擁抱，只係人同人之間一個比較親密嘅社交行為，唔應該係一個用回應物質交換嘅（性）服務。就算係平時，擁抱，都唔應該係一項要俾錢嘅援交服務，更加唔應該係當有人請你食大餐或者買嘢俾你時，先用來報答人哋。無論係唔同嘅文化，擁抱都係一個作為支持、安慰、同情、或者用以表達喜悅同快樂嘅無言而具體嘅表達，係真摰感情同溫暖嘅表現。

如果你係認真參與哩個活動，就唔該唔好有「攞着數」嘅唸法，無論係攞人着數定係俾人攞着數都係。就算唔參與，都唔應該用哩種成敗得失嘅思維去論斷free hug。無論對方係乜嘢人，都請相信互擁嘅雙方，係出於對彼此嘅真誠，你情我願咁張開雙手相擁，俾參與嘅人响哩個活動入面以擁抱互相支持。

講到尾，Free hug之所以free，唔係走去抱抱嘅人唔需要付出啲乜嘢就「免費」「冇代價」咁得到俊男或美女嘅擁抱一個，而係大家都互相尊重對方嘅選擇，重視，同時回應對方所作出嘅付出，以相擁體現人類文明自由價值嘅最高表現。無論係hug 定唔hug，都係大家互相尊重彼此自由選擇嘅結果，because it is free。