2024香港年度字選舉結果正式出爐，「屌」字以壓倒性17.9%嘅得票率連續兩年成功當選，成為今年最能代表香港人情緒同社會氛圍嘅漢字，而執笠個「執」字就成為咗唔計粗口嘅年度代表。今次選舉吸引咗156位香港人參與。
「屌」字今年雖然同樣當選，投票者認為呢隻字都係表達緊唔同嘅感受。連登會員Temp就留言話：「嘆住氣輕輕地屌都表達到心淡」有人認為「單字嚟講 屌應該冇對手」，亦都有網友表示「喜怒哀樂， 屌字都carry到」，或者都係呢隻粗口字先表達到香港人呢兩年嚟百感交雜，一言難盡嘅心聲。
如果唔用粗口又得唔得呢？香港人就揀咗非常地道嘅香港話，執笠個「執」字去代表2024。根據本港傳媒調查，喺2024年，「至少有20間連鎖品牌全線執笠」，而過去一年有7間戲院結業，睇嚟好多餐廳同老字號執笠嘅消息都成為香港人對2024嘅集體記憶。
作為一個真正公平公開嘅年度字選舉活動，有唔少香港字都獲得提名。票數唔少嘅「窮」、「冤」、「獄」，就紀錄咗香港今年經歷眾多案件，包括47人案、立場新聞案等裁決，喺香港人眼中係幾咁不公不義。
活動背景同意義
香港年度字選舉嘅靈感源自日本1995年開始嘅「今年の漢字」，目標係透過一個字總結該年嘅社會集體感受同事件。過去由親北京政黨舉辦嘅類似活動，因為政治立場而失去市民信任。2023年，KongHub 聯同本地文化推廣者重啟呢個活動，為香港人提供一個真正反映民意嘅平台。2023年嘅年度字係「移」，深刻反映出大量移民潮對香港社會嘅影響。「跌」同「離」亦描述咗當年經濟同社會氣氛嘅波動。
用香港字寫低香港故事
KongHub創辦人陳樂行就話，舉辦呢個活動除咗可以俾香港人寫低自己心聲，亦都係呼籲所有香港人繼續用香港話，用自己嘅語言文字，去書寫屬於自己嘅故事。「每一粒字都反映時代同個人嘅記憶，等我哋用最屬於香港人嘅文字，去記錄香港嘅真實故事。」
被提名嘅字包括：「屌」、「執」、「興」、「赤」、「窮」、「冤」、「變」、「騙」、「獄」、「失」、「囚」、「廢」、「亂」、「侵」、「冇」、「鳩」、「含」、「閪」、「柒」、「難」、「跌」、「屄」、「墮」、「頹」、「靜」、「殆」、「慘」、「蝕」、「撐」、「超」、「離」、「差」、「北」、「𨳊」、「愛」、「灰」、「怒」、「壞」、「風」、「醜」、「牢」、「賓」、「哀」、「淡」、「吓」、「哭」、「是」、「復」、「迷」、「議」、「忙」、「判」、「念」、「不」、「貧」、「唐」、「繽」、「由」、「敗」、「冧」、「宕」、「屈」、「魚」、「窒」、「寂」、「悲」、「死」、「破」、「笠」、「歪」、「禁」。