長期腦磁激可能延後阿茲海默症衰退
大家都知道一旦不幸患上阿茲海默型認知障礙症，病情通常會漸惡化。多管齊下優化飲食、運動、和控制風險因素可以降低認知障礙症罹病風險。雖然未有大規模試驗調查患病後可否令衰退減速，但相信仍然值得跟從。
近年來出現嘅抗澱粉質治療可以減少認知衰退，但只適合用於早期病友，而且效果必須要長期使用超過一年始明顯。
除咗藥物，多年來，世界各地研究人員亦有嘗試用腦磁激來醫治認知障礙症。腦磁激又名經顱磁刺激術，係指放電磁圈喺病友頭上，用短暫磁脈衝刺激大腦固定區域。
意大利研究人員今年就報導為期52星期嘅隨機對照腦磁激試驗。所有參加嘅病人都屬輕度或中度認知障礙症，並且經過腦脊液或正子掃描確證為阿茲海默型。
結果令人鼓舞，經過腦磁激後，病友認知障礙症狀惡化速度減慢。社區活動能力，及自我照料能力都可以維持比較耐同好。過度興奮，過度冷淡，及胃口異常都減少。從測試睇來，效果可以早到十二個星期內就見到。
不過，腦磁激治療阿茲海默症或一般認知障礙症，目前仍屬試驗階段，未能進入正式可以推薦時代。
原因係實驗結果雖然滿意，但係今次參加者人數不多，實驗組只有27個人。之前，其他用腦磁激治療認知障礙症嘅試驗雖然同樣報導良好反應，而且參加人數比較多，卻又試用時間都太短，不到半年。所以長期使用價值仍待證實。
其次，目前磁場應該刺激邊個位置及方法缺乏共識，實驗者各施各法，之前都選擇背外側前額葉皮質或較廣泛區域。而今次就專登集中刺激大腦頂葉內側嘅楔前葉。現在還有一個針對楔前葉嘅美國加洲大學試驗。但好可惜，人數仍然有限，只計劃有52名參加者。
腦磁激點解可以有效果？目前已見報導嘅有動物或體外實驗證據機制包括改善神經細胞突觸功能及可塑性，提升腦淋巴系統清潔效能，以及影響澱粉質及濤蛋白積累等等。但我哋目前唔清楚，是否所有類型認知障礙症都有機會得益。
腦磁激背外側前額葉皮質已經證實有助治療抑鬱症。副作用有限而且輕微。目前睇來，亦好有可能幫到阿茲海默型認知障礙症。
期望會有大規模及大樣本試驗可以確實腦磁激嘅效果。
Koch G, Casula EP, Bonnì S, Borghi I, et al. Effects of 52 weeks of precuneus rTMS in Alzheimer’s disease patients: a randomized trial. Alzheimers Res Ther. 2025 Apr 2;17(1):69. doi: 10.1186
Wu M, Song W, Wang X, Teng L,et al. Efficacy of non-invasive brain stimulation interventions on cognitive impairment: an umbrella review of meta-analyses of randomized controlled trials. J Neuroeng Rehabil. 2025 Feb 5;22(1):22. doi: 10.1186/s12984-025-01566-3
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文：黃震遐醫生 Facebook（原發佈日期：2025年9月13日）。本文經作者授權由 Konghub 整理轉載，保留粵文原意及醫學文獻資料。
醫學資訊只供公眾教育，唔代替個人診斷或治療建議；如有症狀或用藥疑問，請向合資格醫護人員查詢。