提防跌親，唔好忘記練臂力
長者跌親係常見事。有研究指65歲以上長者四個中間每年到少會有一個跌親。跌親當然可大可少。跌可以前後跌，或者打側跌。向前扑多時引起腕骨骨折。倒後跌就容易撞親頭。打側跌就好容易引致大髀骨上端骨折，要做手術。因此，長者要提防跌親，大家都明。
但點樣防？
以往，大家都著重腳力。企唔穩，固然容易跌、腿冇力，舉唔高隻腳，就容易棘親，扑倒。但行喺滑地上，跣，亦係常見原因。
打側跌時，除咗腳力及腰力，要拉住身體唔好向前側，重有一樣緊要動作係跣嗰隻腳另一側手臂(右腳左臂，左腳右臂)，嘅反應。嗰隻臂同跌方向相反嘅動作，可以防止後生人七成嘅側跌。
最近有研究證實側跌時，長者同後生手臂外展角度一樣，說明反應一樣。但係，關鍵問題係，速度就慢咗。長者手臂加速外展慢百多毫秒 (研究中外展到位時間遲310毫秒)，就係跌唔跌嘅關鍵時差所在！手臂增加每一千弧度/秒平方嘅角加速度就可以減少兩厘米側向重心移動。
當然如果有肌少症，或平時上肢只係用來擔碗擺嘢揸筷子，點會夠快？
因此，防側向跌同防大髀骨折，隨咗練腿力腰力，手臂力同速度亦非常重要。不少鍛煉身體方法教人要快速郁動隻手亦可能會有呢個作用。不過，要注意如果長久未練，太大力揈分分鐘會撕裂軟組織造成肩週痛。
"Lee-Confer JS, Lo MK, Troy KL. Age-Related differences in arm acceleration and center of mass control during a slip incident. Sci Rep. 2025 May 6;15(1):15727. doi: 10.1038/s41598-025-00412-9"
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文來源：黃震遐醫生 Facebook 原文（July 5, 2025）
本文經作者授權由 Konghub 整理轉載，保留粵文原意及醫學文獻資料。
醫療聲明：醫學資訊只供公眾教育，唔代替個人診斷或治療建議；如有症狀或用藥疑問，請向合資格醫護人員查詢。