預防阿爾茨海默病面臨大突破
單抗治療認知障礙症似乎係世界各地熱門話題。但如其買貴藥事後補鑊，不如預防更為著數，更為經濟實惠。
早前多篇研究已經指出打預防生蛇針疫苗可以降低認知障礙症風險。效果更遠遠超出用單抗治療嘅療效幅度。英國NICE國立優化健康與照顧機構最近確認Lecanemab及donanemab相應於價錢，效果都不值得由公費支助。歐盟同樣對此類藥嘅療效仍未滿意。
英國牛津大學前幾日就提出新推測，如果證實，會係預防認知障礙症巨大突破。
新分析指唔止係防生蛇疫苗有效，防呼吸道合胞病毒疫苗同樣有效，而且相似。打疫苗後年半內已經少三成左右患認知障礙症風險。如果兩隻疫苗都打，效果雖然比打一隻明顯，但統計上未達更佳效益意義。
重要係佢哋發現，打完疫苗三個月，已經見到認知障礙症發病率分別。
呢個結果有兩個可能解釋，一係傳染病可以促進認知障礙症。因此打疫苗有益。但研究人員覺得另外一個機制更可能：兩種疫苗都用嘅佐劑。佐劑係加入疫苗劑，增加身體接觸疫苗抗原後產生免疫答應嘅物質。兩種疫苗都用咗AS01佐劑。AS01佐劑主要成份都喺小鼠實驗中證實有助透過免疫系統對抗阿爾茨海默病理。
因此，佐劑始係護腦功臣！
如果呢個推測正確，我哋正面臨一個大突破，可以為阿爾茨海默型認知障礙症帶來更便，更安全有效嘅預防方法。
而暫時來講，再提大家，如果你已經踏入退休年齡，請打防生蛇疫苗或防呼吸道合胞病毒疫苗，既可以防生蛇劇痛，又可以防長者肺炎重要殺手(呼吸道合胞病毒肺炎暫時冇特效藥)，更可以防認知障礙症。咁著數都唔做，就真會係走寶啦。
"Taquet M, Todd JA, Harrison PJ. Lower risk of dementia with AS01-adjuvanted vaccination against shingles and respiratory syncytial virus infections. NPJ Vaccines. 2025 Jun 25;10(1):130. doi: 10.1038/s41541-025-01172-3."
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文來源：黃震遐醫生 Facebook 原文（June 27, 2025）
本文經作者授權由 Konghub 整理轉載，保留粵文原意及醫學文獻資料。
醫療聲明：醫學資訊只供公眾教育，唔代替個人診斷或治療建議；如有症狀或用藥疑問，請向合資格醫護人員查詢。