高劑量維他命D 可以減少多發性硬化風險
有啲病友可能首次突然視覺矇矓，或者手腳身體突然感覺異常，或冇力，照完核磁共振掃描發覺視神經、脊髓、或腦部多處有脫髓鞘病灶，因此符合診斷為臨床孤發症(又名臨床單一症候群)。
佢哋發作一次之後，可能以後都冇事，但亦有部分就會變成咗多發性硬化。不同種族，地區風險都唔同。西方一般比較高，可以去到六到八成機會。因此，如何防止首次發作後，惡成多發性硬化就極為重要。基本上來講，後生啲，維他命D不足，病灶多， 同腦脊液寡株落條帶都表示風險較高。
點可以防止演進為多發性硬化？
研究人員最近報告法國36 個中心合作完成嘅雙盲隨機試驗，跟蹤24個月後，證明每兩星期服維他命D十萬IU，可以減少高病人出現多發性硬化風險三成。期間維他命D並冇任何有意義副作用。
維他命D效果對維他命D水平比較低，脊髓當初有發炎，同正常身體質量指數病友尤其比較顯著。
以前有過其他試驗都無法證實維他命D 有用。原因似乎係劑量較低，跟蹤比較知期，同病人患病時維他命D正常。
"Thouvenot E, Laplaud D, Lebrun-Frenay C, et al. High-Dose Vitamin D in Clinically Isolated Syndrome Typical of Multiple Sclerosis: The D-Lay MS Randomized Clinical Trial. JAMA. Published online March 10, 2025. doi:10.1001/jama.2025.1604"
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文來源：黃震遐醫生 Facebook 原文（March 18, 2025）
本文經作者授權由 Konghub 整理轉載，保留粵文原意及醫學文獻資料。
醫療聲明：醫學資訊只供公眾教育，唔代替個人診斷或治療建議；如有症狀或用藥疑問，請向合資格醫護人員查詢。