驗大便可能顯示有冇多發性硬化風險
多發性硬化病友唔止係神經系統有問題。腸屏障亦欠佳，會滲漏，容許有毒物質進入血液。
科學家最近發現新確診多發性硬化病友嘅腸道細菌同正常人唔同。啱診斷到，未開始任何藥物之前嘅病友，大便所含有嘅細菌，披一層IgA抗體嘅細菌明顯比常人少。細菌種類亦唔同，普拉梭菌Faecalibacterium 比較少，而果膠單核菌Monoglobus就比較多。而經過半年B細胞清除療法治療後，病友腸道就恢復同正常人一樣。
之前已經有研究發現，腸道減少披IgA抗體嘅細菌，同多發性硬化病發及身體殘害有關。普拉梭菌會生產丁酸鹽，從而維護腸屏障完整性。腸炎症、腸癌、柏金森病、阿茲海默病朋友都往往比較少普拉梭菌。而果膠單核菌過多就會分解保護腸道屏障嘅果膠。
目前睇來，胆腸道異常可能係多發性硬化風險增高機制之一。究竟呢個係因為飲食或其他因素引起就仍然得進一步研究。但另一方面，驗大便，亦可能將來成為評估患多發性硬化風險嘅方法。
"Vinod K. Gupta et al, Alterations in Gut Microbiome-Host Relationships After Immune Perturbation in Patients With Multiple Sclerosis, Neurology Neuroimmunology & Neuroinflammation (2025). DOI: 10.1212/NXI.0000000000200355"
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文來源：黃震遐醫生 Facebook 原文（February 21, 2025）
本文經作者授權由 Konghub 整理轉載，保留粵文原意及醫學文獻資料。
醫療聲明：醫學資訊只供公眾教育，唔代替個人診斷或治療建議；如有症狀或用藥疑問，請向合資格醫護人員查詢。