傾偈幾流暢，你命就有幾長
唔少研究都指出認知能力同壽命有關。壽星公，壽星婆通常都係頭腦醒目，完全冇老懵董迹象。
德國研究人員最近發表咗一項長期研究結果證實同長壽最關連嘅認知特徵係語言流暢。愈流暢就愈長命，研究中最流暢同最唔流暢組足足有九年壽命之别！
研究人員從1990到2009年間八次招募咗七十歲及以上長者，總共516人，男女各半。跟蹤至死亡，最長18年，到所有參加者都已經過身。分根析發覺語言流暢係所有認知測試中最好以預料壽命嘅。
因為係德國人所以佢做嘅語言流暢度作一分鐘講幾多動物，及一分鐘講幾多S頭嘅字。
如果華人做呢啲測試就略會有不同測試項目，例如問動物、蔬菜、水果。
語言流暢度其實測試到快速取用相關資料，健全記憶，判斷能力，等等認知能力。臨床上，同大腦額葉及前額葉皮層及聯繫健康有關。認知障礙症及柏金森病患者一早就會見得到講話不流暢現象。
如果留意到親友近排傾偈唔順𣈱，請考慮早啲搵醫療人員為佢做檢查。
"Paolo Ghisletta et al, Verbal Fluency Selectively Predicts Survival in Old and Very Old Age, Psychological Science (2025). DOI: 10.1177/09567976241311923"
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文來源：黃震遐醫生 Facebook 原文（March 21, 2025）
本文經作者授權由 Konghub 整理轉載，保留粵文原意及醫學文獻資料。
醫療聲明：醫學資訊只供公眾教育，唔代替個人診斷或治療建議；如有症狀或用藥疑問，請向合資格醫護人員查詢。