《謝謝你留下來陪我 》，一本令人心暖又心痛嘅書

《謝謝你留下來陪我 》，一本令人心暖又心痛嘅書

最近睇咗本值得向各位朋友推薦介紹睇嘅書：《謝謝你留下來陪我》。

書係由一位整容外科醫生寫，關於佢先生認知障礙症嘅書。華人過去對自己及家人患病都不太願意公開，畀人知道。近十年來，少數人始開始改變習俗，將患病者或照顧者心路歷程話畀人知，使其他人可以由此得益，同路人更能夠克服疾病帶來嘅種種心理及身體困擾，健康者亦可以更能了解病者及照顧者嘅需要而伸以同理。

書特別地方係作者本人係台灣著名醫生，而佢先生，林芳郁更係台灣心臟外科權威人物，又擔任過多間醫院院長，及衛生署長。佢係六十九歲，掌管間醫院時起病，過去五年都病情比較嚴重。

書前半部交待兩人從年輕同學至終生伴侶經過，以及林醫生病前嘅工作，性格，及做事態度。佢哋後生時，台灣同大陸一樣，醫生會收病人紅包，林芳郁就一於堅決，唔收，而且帶頭消滅呢種陋習。近年來，香港有啲醫學院教授滿腦只係寫論文，寫得多始算威威。但係林芳郁執教台大時，雖然研究得過國際獎項，著重卻是如何培養人材，造福病人。佢喺醫院進行不少改革，其中最重要係催生台灣十字車配備緊急救護技術員制度，令病人可以一上救護車就進行搶救。

但令人悕憈係，書後半本卻要交待林醫生從醫人嘅醫生，變成病人，同佢太太作為照顧者嘅辛酸。而呢方面佢太太真係衝破禁忌，唔怕傷害林醫生嘅形象，將佢患認知障礙症後種種問題，一一暴露，列出細述。咁嘅交待經驗對知障礙症嘅家人，會有好大幫助，除咗傳遞經驗及應付方法，更係畀嗰啲家屬知道，原來名醫照顧認知障礙症都不容易，自己應付不來就唔使內咎。另外，亦會畀世人了解照顧者咁辛苦，都需要體貼及照顧。英國現在投入大幅支援畀照顧者就係基於呢個問題。認知障礙症唔止係患者問題，而實係全家問題。醫生同醫療制度不可以以為向病人派幾粒藥，打啲針，就算完成任務。

但令人更傷感地方係，佢哋兩位名醫，竟長時期都無法得到診斷更遑論治療。書冇講清楚病人嘅風險因素，唯一可知係林醫生病前有高血壓，腎功能不佳，同極少運動，連步行都欠缺足夠。 佢最初症狀似乎唔係健忘，而係焦慮，及瞓覺時間縮短，瞓幾個鐘頭就醒，準備上班。

當然，一般人都只留意健忘係認知障礙症症狀，但其實初發症狀重可以係語言、行為變化，及精神狀態。焦慮尤其常常係血管性認知障礙症初期症狀。

佢輕微認知障礙階段冇被發覺。只係去到認知障礙症時始被診斷。當然，佢較少嘅初呈症狀可能係佢延遲確診嘅原因。但我覺得重有一個問題係台灣稱病為失智症。作者形容聽到佢有失智症，係青天霹靂！有段時期根本不願意接受診斷。而佢哋識好多名醫，都一一推搪，唔肯幫手確診。同腦退化一樣，失智名稱含有貶意。我相信有啲醫生早有懷疑，但礙於病名有污瀆之嫌，佢哋都避開做應做檢查，害怕到時唔知點交待。只要諗，醫生對自己尊重嘅長輩話“我想同你做啲檢查睇你有冇失智”，同“我想同你做啲檢查，睇你認知有冇受到障礙”，兩句話分别，便可知道名稱如何可以阻礙診斷。

另一個問題係，香港稱為認知障礙症，重點便會在拆除障礙，而不是只講善後。所以如何預防病情出現或惡化，令病人停留在輕微狀態較耐，成為治療目標。但從作者書中所述，台灣許多醫生已經被失智兩字擊敗，大概覺得已經失去了智能，無可為力，所以不會教病人如何應付將來可能出現嘅症狀。更當然冇提如何預防。大陸用痴呆一字，一旦被診，病人同家屬得到嘅援助亦似乎一樣或更差。

呢本第一手經歷嘅書值得所有照顧認知障礙症者家人，朋友，及醫務人員嘅閱讀。書唔止會令我哋更能明白呢個病嘅後期症狀，及對照顧者嘅深遠影響，亦值得我哋跳出狹隘嘅藥物或手術框框，放眼更大需要考慮嘅系統及文化問題。而作為額外收獲，你亦會透過呢本書知道，執子之手，與子偕老嘅誠意與恩愛，在呢個世界始終存在。

關於作者：黃震遐醫生

黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。

作者理念：「上醫治未病，中醫治欲病，下醫治已病。」

原文來源與授權

本文經黃震遐醫生授權，由 Konghub 整理及轉載。查看 Facebook 原帖。

醫療免責聲明

本文只供健康教育及一般參考，唔構成個人醫療診斷或治療建議。如有症狀或用藥疑問，請向合資格醫護人員查詢。