腦癎都同腸有關？
意大利研究人員日前發表咗一篇有趣文章。佢係發現腦癎症病童同健康兒童比較，糞便一種叫亨蓋特氏菌屬hungetella 嘅細菌數目增多。而受藥物控制嘅腦癎症病童，糞便就比藥物無法控制病情嘅病童比較多真桿菌屬Eubacterium siraeum。
腸內細菌組合同腦神經多種疾病都有關聯。研究相信不少腦部疾病都係因為腸內有過多有害細菌或過少有益細菌所造成，或增加風險而致。
之前已經有研究發現腦癎症成人病友糞便細菌組合同健康人唔同。呢次研究就伸延到兒童，說明無論兒童或成年腦癎症病友同一般健康朋友糞便都會有别。多發性硬化同嚴重抑鬱症病友糞便都會較多亨蓋特氏菌。亨蓋特氏菌睇來可能會傷害腦神經系統。
真桿菌屬係有益嘅細菌，呢種細菌生產一種叫丁酸鹽嘅短鏈脂肪酸。短鏈脂肪酸吸收入身體後會進入腦部，壓抑腦癎活動，降低腦部炎症。真桿菌屬亦會生產另外一種壓抑腦癎症活動嘅化學品γ-氨基丁酸。之前已經另外有研究同樣發現不受藥物控制嘅腦癎症病童，糞便中比較少真桿菌屬。而經過生酮飲食後，腦癎症改善，同時亦見到真桿菌屬多咗。
抗腦癎症藥物本身可以影響大腸細菌組合。因此要確實呢啲細菌變化同藥物、飲食組合，自己基因等等嘅關係，何為因果目前仍舊為早。但此次研究同先前研究都說明腸道同腦有重要關係。而健康飲食亦係腦癎症病友不可忽略嘅重要問題。
Riva A, Sahin E, Volpedo G, Catania NT, Venara I, Biagioli V, Balagura G, Amadori E, De Caro C, Cerulli Irelli E, Di Bonaventura C, Zara F, Sezerman OU, Russo E, Striano P. Medication-resistant epilepsy is associated with a unique gut microbiota signature. Epilepsia. 2025 Mar 22. doi: 10.1111/epi.18367
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文來源與授權
本文經黃震遐醫生授權，由 Konghub 整理及轉載。查看 Facebook 原帖。
醫療免責聲明
本文只供健康教育及一般參考，唔構成個人醫療診斷或治療建議。如有症狀或用藥疑問，請向合資格醫護人員查詢。