大家都知道要逳隻手同手指，意願必須經過大腦運動區域發號施令，將命令傳畀脊髓運動神經細胞。中風傷害咗運動區或下達信息嘅線路就會導致肢體癱瘓。之後康復結果通常都係下肢復原得比較好；上肢，尤其係手同手指康復就往往認真麻麻，基本上無法再用來執行日常生活所需要既動作。
大腦受損後，對側小腦新陳代謝會下降。我哋都知道小腦同肢體協調有關，小腦疾病時，病友隻手會搖晃不定，無法準確描准目標。但大腦皮層會傳信息經橋腦到小腦，小腦又會使用別一條路徑，經丘腦上達大腦。咁密切聯繫，只為協調？
研究人員近幾十年來一路都思考呢個問題，卒之認識到小腦同大腦控制肢體運動，不止在協調咁簡單。從此推測小腦可能幫得到中風復原。
前幾日，研究人員公布咗初步探索結果，非常令人鼓舞。
12名大腦中動脈梗塞，造成中至嚴重偏癱病友，似乎要成世人手部殘廢，患病後12-36個月後參加試驗，喺腦損壞對側小腦齒狀核內安置電極，胸骨附近放置起博器，然後觀察進行兩個月復康訓練期，加埋八個月電刺激，以及停止刺激後，手部功能情況。
結果發覺只要病友仍可以伸展手腕及兩隻手指，又可以逳動大拇指，小腦齒狀核刺激下就可望手及手指動作獲取到顯著進步，從嚴重進為中度、從中度進為輕度癱瘓。而大腦運動區新陳代謝亦會同步增加。停止刺激後，效果會逐步減退，但未必全部消失。
據wired雜誌22號訪問，進步後，啲病友本來冇用嘅手可以使用梳，揸杯，開燈熄燈，手可以開合，手臂可以舉高過頭。因此日常生活質素大為提高。
手術及刺激都冇任何重要副作用。
研究人員現在計劃做一個隨機試驗， 測試更多病友，希望可以證實此方法能為中風或其他腦部損害病友解決手部復康問題。
早排，已經貼出過用另外方法來改善手部癱瘓嘅實驗結果。睇來，中風病友來緊幾年，實會收到更多好消息。亦當然會有機會從此重奪得失去嘅手部功能。
Gopalakrishnan R, Cunningham DA, Hogue O, Schroedel M, Campbell BA, Plow EB, Baker KB, Machado AG. Cortico-cerebellar connectivity underlying motor control in chronic post-stroke individuals. J Neurosci. 2022 May 23;42(26):5186–97. doi: 10.1523/JNEUROSCI.2443-21.2022
Baker, K.B., Plow, E.B., Nagel, S. et al. Cerebellar deep brain stimulation for chronic post-stroke motor rehabilitation: a phase I trial. Nat Med (2023).
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文來源與授權
本文經黃震遐醫生授權，由 Konghub 整理及轉載。查看 Facebook 原帖。
醫療免責聲明
本文只供健康教育及一般參考，唔構成個人醫療診斷或治療建議。如有症狀或用藥疑問，請向合資格醫護人員查詢。
