值唔值得接種帶狀疱疹疫苗？
我哋小嗰時都冇乜人未出過水痘。水痘雖然好返，隻病毒卻通常賴死唔走，匿埋喺神經細胞節裏面。趁宿主身體弱時候，隻病毒就又會出來作怪，形成先痕後極痛嘅紅疹，水疱。醫學上稱為帶狀疱疹，俗稱生蛇。
生蛇係常見病，古人話：三人行，必有我師。三人行，未必見到師傅，但多數會見到生過或會出蛇嘅。年紀愈大、免疫能力愈差、有糖尿病，風險就愈高。如果生蛇好似水痘，辛苦一輪就痊癒，咁都冇乜所謂。但部分人可能持續劇痛唔止。如果係頭部生蛇更可能盲眼、臉癱。
因為常見，而可以用種疫苗預防，醫學界贊成上咗年紀就注射帶狀疱疹疫苗。有不少國家更會為公民提供免費疫苗。雖然咁，一般人仍然唔重視，疫苗接種率因此往往都得二，三成。而香港目前冇免費服務。有嘅第二代疫苗，價錢要港幣五、六千元，更會令人欲步。
但係，仍在審批中嘅一篇文提醒大家，上咗年紀就可能真係要認真考慮種帶狀疱疹疫苗了。
威爾斯喺2013年九月一號開始提供免費疫苗。但因為用第一代疫苗，對80歲以上人效果不顯，所以，只有1933年九月二號以後出世嘅有資格接種。研究人員就乘此機會分析1933年九月二號前一星期及後一星期出生者生蛇及認知障礙症發病率。
早一星期，後一星期出世，照道理冇理由生蛇及認知障礙症發病率會唔同。但前者冇種帶狀疱疹疫苗。後者近半數就種咗。結果喺之後七年中，後一星期出世群組如料，生蛇少過前一個星期出世群組。
而更緊要係：七年中，後者認知障礙症竟然少過前者兩成之多！效果對婦女減少阿兹海默型認知障礙症尤其明顯。
之前其實都已經有不少報告同樣指帶狀疱疹疫苗可以減少認知障礙症。但呢篇報告說服力就更高。由於當年使用效力比較弱嘅第一代疫苗，第二代疫苗效果可能會更明顯。無論如何，如果報道通過審核，數據並無重要錯誤，醫學界就應該循呢個新預防方向作進一步臨床探索。疫苗點解可以喺短短幾年內顯示出保護作用，更暗示認知障礙症發病機制可能仍有不少未知之處值得追究落去。
長者似乎應該值得諗下，要唔要為防生蛇，接種帶狀疱疹疫苗了。因為可能會買一送一，減少埋認知障礙症風險添。
medRxiv preprint
Causal evidence that herpes zoster vaccination prevents a proportion of dementia cases
Markus Eyting, Min Xie, Simon Heß, Simon Heß, Pascal Geldsetzer
doi:
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文來源與授權
本文經黃震遐醫生授權，由 Konghub 整理及轉載。查看 Facebook 原帖。
醫療免責聲明
本文只供健康教育及一般參考，唔構成個人醫療診斷或治療建議。如有症狀或用藥疑問，請向合資格醫護人員查詢。