最近見到網上有言論話飲茶可以導致癌症。睇完呢類文章，有啲朋友可能都會心大心小，無可適從。因此，覺得都應該整理下呢方面資料，澄清一下。
首先，對健康好重係壞，唔可以只睇一種病。最重要應該係飲茶對身體整體健康有益重係有害。答案好清楚，來自各地研究都發現飲無論綠茶或紅茶都可以降低死亡風險，有利長壽，亦可以減低心腦血管病、認知障礙。
咁癌症又點呢？
其實李立明同佢團隊2019年發表過一篇涉及五十萬大陸居民研究，結論係除胃癌之外，飲茶同癌症無關。既無益，亦無害。而樣本中，胃癌同飲茶關係，雖然似有關卻不能確定(其他學者研究則認為飲茶減低胃癌風險)。但飲茶之外又吸煙飲酒嘅人就增加肺癌、大腸癌、肝癌。大家都知道呢三種癌都冋吸煙飲酒有關。好可惜，有啲網站睇唔明篇文，就沙哩弄銃，大做文章話飲茶可能會引發各種癌病。跟着，其他人唔經考證，以訛傳訛，就流傳出飲茶致癌謠言。
但唔只係網上人糊塗，亦有不少研究人員發表文章話飲熱茶會導致食道癌。問題係喜歡飲熱茶嘅人往往又係鍾意飲酒吸煙。唔單咁，過往研究顯示經常飲滾熱咖啡同滾熱湯、食滾熱食物，都會增加食道癌風險。原因大概係因為高溫飲料可以𤊶傷食道，長期損傷之後形成癌症。所以，所謂飲熱茶會增加食道癌風險，其實只反應飲料太熱，根本同茶本身無關。
按泡茶嘅水溫，因茶而異。紅茶要用滾水。廣東人鍾意飲嘅普洱、六安亦係需要滾水冲。龍井、碧螺春之類綠茶，白毫銀針、白牡丹、壽眉之類黃茶都係要低溫，75-85℃就夠。屬半發酵茶嘅烏龍、鐵觀音就80-90℃。換言之，冲茶要用高溫度水。
國際癌症研究機構2016年時認為飲品溫度超過65℃就好可能致癌。近年資料顯示60℃可能已係唔應該超越嘅溫度。所以啱冲完，茶會過熱。但實驗發覺飲茶或其他飲品時，超過45℃已經會感覺得到過熱，所以用呢個標準飲茶比較安全。不過要注意經常飲慣咗熱茶，口腔測覺高溫度亦會轉弱。當人一口熱茶，一口食物時，亦可能失去警告，飲咗過熱嘅茶入去。
當然，唔只係熱茶，過熱咖啡、湯、粥、或其他食物，都會𤊶傷口腔及食道，增加兩處癌症風險。食小籠包、春卷時，都係小心哋好。
*發覺有些機上隻（火剌）字，出唔到，變咗？傷。
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文來源與授權
本文經黃震遐醫生授權，由 Konghub 整理及轉載。查看 Facebook 原帖。
醫療免責聲明
本文只供健康教育及一般參考，唔構成個人醫療診斷或治療建議。如有症狀或用藥疑問，請向合資格醫護人員查詢。