青年發展委員會昨日（22）於網上舉行首場政策專題會議，主題係「青年就業」。會上有中大畢業嘅文科生指寄咗70多份CV都搵唔到工作，張就寄語年輕人「唔好太揀擇」，表示年輕人「應放低身段，追求理想」，「洗碗都係工作經驗」。
來自中大歷史系嘅應屆畢業生Chloe稱，文科生嘅專業技能同知識相對較理科及商科生少，變相競爭力較低，加上疫情影響令市場上嘅工作機會大減，佢舊年11月起寄咗70幾份CV都冇回音，「搵工遇到好多困難」。張建宗回應指，唔覺得文科生會較難「搵工」，僱主最著重嘅係態度，舉例話自己睇到好多警員大學畢業，考唔到督察，就由最低級嘅警員做起，最好都攞到「銀雞獎」，最重要係「放低身段，追求理想」。
佢又話，「洗碗都係工作經驗」，青年人應該做好期望管理，而CV上有「捱得嘅工作經驗」或會令打動到僱主，覺得「你好有上進心」。
勞福局局長羅致光就叫年青人應該「敢於嘗試」，稱自己當年「無讀過無學過」，但都「仆去做」一份關於電腦的工作。
會議上嘅數據指出，本港的最新失業率是6.1%，但15至29歲青年失業率高達22.1%，而20至24歲青年失業率則有16.2%。被問及當局有咩政策可以幫助青年就業，羅就叫年輕人「不要太悲觀」，指全世界大部分國家嘅年輕人失業率都會比其他年齡層高三至四倍，「香港青年嘅失業比率已唔算高」，又呼籲他們要自我增值，例如可以參加政府今年加碼嘅「展翅計劃」。