經過接近一年喺海外嘅隱居生活，我最近先開始出席一啲香港人嘅公開座談會。主持人問到，面對港共極權無遠弗屆嘅鎮壓，海外嘅香港人有乜嘢可以做？我好真心咁回應：「我哋要先照顧好自己。」好多人會話，捐錢、投票、組織文化活動、搞班，呢啲固然係好重要，但首先最緊要嘅係，我哋要先醫返好自己嘅心靈創傷，並且解除心底埋藏嘅恐懼同詛咒。

呢番感受源自我自己嘅親身經歷。我喺香港從事10年廣東話保育嘅工作，本身呢個議題已經幾敏感、需要唔少自我審查，上年更加因為廣東話徵文比賽嘅一篇參賽文章，俾國安上到我舊居同舊店搜捕。雖然我僥倖身處喺海外，但初時難免都係好驚同好大壓力。

而同時又因為國安嘅搜捕，海外嘅香港人都認識多咗我，邀請我出席唔同活動。一開始我都有啲掙扎，因為我都有種心態想去到外國，就「從此過返啲平靜嘅生活」。但命運總係追住我嚟玩，甚至有學者邀請我去倡議「香港話運動」，好似越搞越大鑊咁！

「廣東話」點可以叫「香港話」呢？對住呢啲新倡議，我承認我曾經都幾拗底。

但當我平靜落嚟，閱讀有關嘅學術著作同文件，我就越睇越發覺，其實真係冇乜問題。香港人講嘅話有自己一套嘅詞彙、語法、讀音，甚至會撈埋啲唔同嘅語言同符號，點解唔可以叫做「香港話」？個學術會議我準備咗大半年，而我越做就越發現，根本阻止緊我去做倡議嘅，唔係真實嘅學術理由，而係呢10年來身處香港，埋藏喺我心底，一直支配我嘅恐懼同不安。

而喺我同其他海外香港人相處，我留意到大家喺2019之後，或多或少都帶住未療癒嘅創傷後遺（PTSD）。有啲人會避免睇返當年嘅影像，有啲人會閂咗社交帳戶，甚至有啲人會行街見到其他香港人會直接閃開……我哋嘅傷口未好返過，我哋根本仲喺到痛。

咁點樣去治療呢？人人都有唔同嘅方法，我自己都試咗好多。我睇過專業嘅心理輔導，放假會走去睇唔同嘅畫廊，亦都開始喺local pub同當地人傾What’s happening in Hong Kong。我最享受嘅，係睇一啲外國嘅棟篤笑（Stand-up Comedy)。

講起棟篤笑，好多亞裔搞笑藝人最鍾意自嘲嘅一樣嘢就係「Asian Trauma」。好多先進國家嘅學者都發覺，亞裔移民之間好普遍都有種普遍嘅心理創傷——咁梗係啦，我哋都經歷咗好多痴撚線嘅事。文革、韓戰、越戰……亞裔父母移民後都唔鍾意同小朋友提佢哋經歷過嘅呢啲事件，但就會將佢哋嘅抑鬱同焦慮帶畀佢哋嘅下一代。我發覺就算喺香港都係咁。我屋企人好避免去傾上一代嘅事，而我將零碎嘅對話串連起嚟，先發覺原來我阿爺作為一個香港人，竟然喺文革嘅時候上廣州撐文革，然後俾人當傻仔咁撚……

但其實唔係應該要調返轉咩？好多人唔講舊時嘅嘢，但就打柒佢哋嘅小朋友。但其實我哋應該同佢哋講舊時嘅嘢，再愛鍚我哋嘅下一代。「舊時嘅嘢有乜好講？」其實都真係幾好講。試過有當地人聽完我哋經歷過啲乜嘢，即刻buy me a beer。因為喺極權底下，我哋香港人都依然選擇咗良知，而呢份勇氣，全世界聽到都會肅然起敬。漸漸我哋就會發現，我哋身上嘅傷疤，其實都閃耀光輝。

所以香港人要做啲乜呢？其實首先就係照顧好自己個心。擺低所有嘅重擔先。唔需要逼自己一定要參加嗰啲香港人活動，睇啲香港嘅戲，放鬆下，睇下書，入鄉隨俗識下啲Local朋友，冇壞㗎。來到外國呼吸到啲自由空氣，咪呼吸多幾啖先囉。

當你調整好心態，你就會發現，原來香港人做嘢都幾掂，適應外國生活唔係真係咁難。搵返個好嘅心態，融入返個節奏之後，你開始會發現，你嘅良知會自自然然帶住你走，幫你喺用你嘅專長同能力去貢獻返香港社群。你愛鍚你嘅仔女，佢哋自然會好願意探索你嘅文化。你關心人哋嘅生活，人哋都會關心返你。關心自己，關心其他香港人，甚至關心其他唔係香港嘅人，自自然然我哋已經建立緊一個無比強大嘅香港族群。

所以，放鬆啲啦，香港人。

港共搞咁多嘢，講到尾咪就係要我哋驚——但其實都走到來外國，仲有乜嘢好驚？

因為連佢哋都知道，只要我哋唔驚，只要我哋唔收聲，我哋就一定會贏。