作者：黃震遐醫生

（標題為編者所加）

之前講過“行得快，好世界”確有道理。行得快有益健康，癌症同心血管病病發率同死亡率都比較低。行得快咗，體重、腰圍、血糖、膽固醇都會改善。認知障礙亦會減少。

現今要加多一句，“瞓得好，好精靈。瞓得差，矇查查。”

美國Framingham Heart Study研究跟蹤咗346名1998-2001年時已經60歲或以上，認智正常長者17年後，期間總共52人呈現認知障礙症。研究人員發現隨住年歲增加，熟睡期*就會減少。而熟睡期每減一個百分點，認知障礙症風險就高咗27%！正如可料，會增加風險嘅載脂蛋白ε4等位基因嘅攜帶者，熟睡期亦比一般人減得多。

熟睡期係瞓得最腍嘅階段，大腦、身體都放鬆哂； 如果夾硬叫醒你，你成個人都會係一嚿暈，懵盛盛。如果夜晚深層睡眠不足，早晨醒返來，都會仍然烏眉瞌睡，冇喱精神。做嘢固然低效力，脾氣亦會臭，容易發𤷪𤺧。

其實，之前都已經不少研究認為瞓唔好，唔夠，都會傷害記憶及增加認知障礙症，又增加抑鬱症。

瞓覺，尤其係熟睡期點解會係同認知障礙症有關？目前合理解釋係，我哋大腦有個垃圾清潔服務，經過淋巴系統搬走腦神經系統裏面各種新陳代謝廢料。呢個系統正正係進入熟睡期時段最活躍。所以，如果熟睡時間不足，就會垃圾累積，阻礙及毒害神經系統功能。另一方面，我哋鞏固記憶亦係喺呢段夜半無人沉睡時，大腦唔做新工作，集中將舊嘅鞏固整齊。

初步研究認為聽覺、視覺刺激，經顱直流微電刺激、或經顱磁刺激都可以增加熟睡期。但詳細可靠方法就都未有共識，未至可以廣泛使用階段。運動同饍食研究都仍然有限。一般安眠藥雖然可以令人入睡，卻會縮短熟睡期時段，反而抗抑鬱藥曲唑酮Trazodone就可以延長熟睡期。

無論如何，大家首先一定要減少失呡，減少引起失眠原因。瞓足時間始會有足夠熟睡期。

要測試準確，當然目前最好係去醫院進行嘅睡眠測試。但現今亦有不少個人穿戴器可以提供有用資料，話畀你知道熟睡期夠唔夠。目前似乎fitbit sensor2 同google pixel watch敏感度及準確度都比其他較好。

*熟睡期=深層睡眠/非快速動眼期第三期

Lee T, Cho Y, Cha KS, Jung J, Cho J, Kim H, Kim D, Hong J, Lee D, Keum M, Kushida CA, Yoon I, Kim J Accuracy of 11 Wearable, Nearable, and Airable Consumer Sleep Trackers: Prospective Multicenter Validation Study JMIR Mhealth Uhealth 2023;11:e50983

Jayandra J. Himali et al, Association Between Slow-Wave Sleep Loss and Incident Dementia, JAMA Neurology (2023). DOI: 10.1001/jamaneurol.2023.3889 doi: 10.2196/50983