作者：黃震遐醫生

（標題為編者所加）

無論你係喺台灣今日慶祝國慶，或者係喺大陸，以十月一號慶祝國慶，或者係喺新加坡，九月八號已經慶祝過國慶，美國八月三號，英國四月廾三日，加拿大七月一號，或者…….，只要係華人，無論國慶邊一日，都應該記得十月十日，而慶祝！

因為幾千年來，華人一直都係畀一人、一家之姓，以帝皇制度統治，沒有屬於自己嘅國家，自己只能被國家擁有。直至到112年前十月十日，武昌起義，始見皇權制度開始崩潰。

武昌起義係無數熱血青年，多年來前仆後繼，視死如歸嘅成果。而佢哋嘅領袖係孫中山。

孫中山1892年以全班第一成績畢業於香港大學醫學院前身嘅香港華人西醫書院。三年後，成立興中會。經過15年努力，始見到初步勝利。

可惜佢所希望華人享有嘅民主制度，「政府的力量過大，人民便不能管理政府，要被政府來壓迫。從前被政府壓迫太過，所受的痛苦太多，現在要免去那種壓迫的痛苦，所以不能不防止政府的能力。」，即使時至今日，仍然遠離大多數華人。

武昌起義後仍然太多阻力需要解決。1925年正月，佢喺北京病倒，醫生診斷為肝臟痛瘍。十多日後出現黃膽。正月26號手術斷定為肝癌。只幾星期後，3月12日，孫中山就過世。死後，病因一直以來都話係肝癌。但係檔案失蹤，肝臟話被焚化，肝臟病理切片失蹤(日軍聲稱占領北京時運到南京放置入中山陵墓中)。總之，無從稽考，進一步確定。1999年時，北京協和醫院喺會議上聲稱掌有解剖報告，說明死因其實係膽囊腺癌。但一路就收埋檔案室，唔肯公開。

直至到2016年五月時，有位美國病理學家去到廣州中山記念館，發現藏有一頁孫中山先生嘅病理解剖報告副本，之後著文公開於世。雖然由於缺乏當時嘅病理切片及報告，未能完全確定，大家都至少可以見到原始資料，比較清楚死因。

當時協和醫院病理學副教授Cash醫生寫嘅報告說明孫中山先生並非死於肝癌而係死於膽囊腺癌，阻塞膽囊管，並且伸延到肝臟及橫隔膜、轉移到腹腔、大小腸各，以及肺部。病理另外亦有膽管石、舊膽囊炎、舊肺結核、等等。癌細胞伸延及轉移範圍完全符合膽囊腺癌，同肝癌轉移模式唔同。膽囊癌九成都屬腺癌，經常伴有膽石及膽囊炎。孫先從起病到逝世只有兩個月。即使今時今日，超過一半膽囊腺癌病人發覺時都已經會係晚期，生存率好低，只有2%可以存活五年。

目前，上海、北京、天津、江蘇、浙江地區都比較多膽囊腺癌。雖然原因話係同西化飲食模式有關，但香港就只有上海、北京，1/3 到1/2。可見問題未必咁簡單。膽囊癌同膽石及膽囊發炎關係密切，而膽石現代主要原因係新陳代謝問題，例如過肥、膽固醇過高及糖尿病。但百年前病因就未必全同。一個要考慮係中華肝吸蟲。孫先生患有膽管石，而華人膽管石病因除咗中華肝吸蟲之外主要只係蛔蟲、血吸蟲、乙型肝炎、丙型肝炎、及幽門螺旋桿菌。以前由於食生魚片容易患上中華肝吸蟲，造成膽管炎及膽管石。中華肝吸蟲亦可引起膽囊癌。孫中山年代，好多廣東、香港人都會食過生魚片。孫先生會唔會係因為食魚生，患上中華肝吸蟲而得到膽管石及膽囊腺癌？ 可惜，由於資料有限，就永遠都無法澄清。

病理報告上寫明，早幾個月，已經發覺腹部右上角有嚿腫脹。孫先生冇可能唔猜得到係乜又唔理。佢大概係以赴死心態，抱病開會，趕著為人民完成工作。

另外一個謎係點解孫中山死後九十年，華人一直都蒙在鼓中，無法知道真正死因？要等到美國病理學家來到始可以揭曉？而Barth醫生寫完稿後，搵協和醫院陳教授合作。陳教授罺*勻協和醫院，都搵唔到本來話收藏埋四樓檔案室嘅病理原始稿件。同華人現代史如此關鍵嘅資料居然會有如此神秘保密下落，就真係令人百思而不解！而至今我亦仍未見到中港台三地中文有翻譯公開畀一般人知道，又認真係難為人明之怪事一椿！

Barth & Chen資料可以公開下載，希望會有有心人幫手多為傳遞消息令一般華人都清楚孫中山先生死因真相。

*粵語搜索，香港粵語大詞典及粵典都用摷字表達。但摷字原意為痛打，同搜索無關。讀音亦原為ziu6，明顯係借字。我選擇用罺，因為原義係捉魚嘅小網，讀音廣韻標為初教切，同耖 caau3。

孫果達 孫中山之死的疑問 上海黨史及黨建 2016(1) 12-15

Xie C, Shi D, Lin H, Liu Y, Liu W, Yin P. Spatial Patterns of Gallbladder and Biliary Tract Carcinoma in China From 1990 to 2019: An Analysis at the Provincial Level. Cureus. 2023 Aug 1;15(8):e42796. doi: 10.7759/cureus.42796.

Wu Y, Xu CJ, Xu SF. Advances in Risk Factors for Recurrence of Common Bile Duct Stones. Int J Med Sci. 2021 Jan 1;18(4):1067-1074. doi: 10.7150/ijms.52974.

Huang SC., Chen L, Eng HL, Chen WJ.Gallbladder adenocarcinoma with gallstone and calcified ova of clonorchis sinensis–a case report. Changgeng Yi Xue Za Zhi. 1994 Mar;17(1):94-9.

Barth RF, Chen J. What did Sun Yat-sen really die of? A re-assessment of his illness and the cause of his death. Chin J Cancer. 2016 Sep 2;35(1):81. doi:10.1186