ADHD 中文應該叫咩？
英文ADHD 中文對應有幾個名，香港稱為專注力不足及過度活躍症，或專注力失調及過度活躍症，台灣稱為注意力不足過動症，而大陸稱為注意力缺陷多動障礙症。海外用的中文譯名多數跟大陸。
我覺得，呢幾個名稱中，專注力失調及過度活躍症係最符合此病症狀嘅。專注力不足及過度活躍症其次。
原因如下，
中文來說，留意，注意和專注係同一個譜系上嘅不同程度。字典往往將留意解釋成等同注意，但使用方面，留意可能只係一種留有記憶的經過，注意就比較多故意去察覺。不同字典都指，注意指把心思或思想放在某一方面，注意力則指關注某一事物的精神力量。而專注則指專心注意，別無旁騖。可見專注是比注意更集中同認真。
其實ADHD朋友唔係唔留意或注意唔到書本，工作，或外界事物，問題係佢哋注意完呢件事，好快又會去注意另一件事，跳來跳去，認真如古人所述，心多旁騖。有部網上短片比喻非常貼切，一般人似普通筆，只有一個筆蕊，而ADHD就似多色筆，不停換筆蕊，或者一齊㩒，整到無法操作。可見，唔係少注意力，而係同時注意太多，而不能一時專注一事。
以上講，ADHD朋友一方面似乎無法集中精神處理當前問題，容易分心，思想脫韁遊蕩。但另一方面，有研究曾發現分心指數同不集中精神，和超常專注都相關。同一人一時又可以過度集中精神，呈現超常專注力，廢寢忘食，專注做一件事。但呢啲超常集中，往往同學習無關，而且無法自拔。事主明知應該做更重要嘅，都無法。有研究指ADHD者比一般人對獎勵嘅到手時間非常敏感，渴望毋須等待，可以即時或近期收到好處。ADHD者由於裁決功能不足，無法壓抑呢種即時收益引力，便無法阻擋事主一時思想跳來跳去，一時又停留專注於未必適當話題。
由以上所述可見，用注意力不足來描述，並不準確。注意力嘅調動，及適當嘅專注始係問題所在。形容為失調較為貼切。
名稱上台灣用嘅過動症，同大陸用嘅多動障礙症，容易引起誤會，以為係一種運動系統問題，同抽動，舞蹈症之類具有臉部，或肢體不自主特徵相似。ADHD只係行為活躍，難以坐定定，易以郁來郁去，甚至多口多嘴。更重要係，女ADHD者往往內在化佢哋嘅過度活躍，因此外表上，似乎同一般人一樣，冇話坐唔定，多口多嘴。但內心情緒及思維卻係過度活躍，令佢覺得不安，唔耐煩，會打斷人哋說話。因此被人當作係一個冇耐心，壞脾氣嘅人。從此可知，過度活躍遠比多動準確。
最後，ADHD朋友往往受到偏見及歧視，不受老師歡迎，被同學排擠，在職場上也同樣受到欺淩及歧視。指他們的病是缺陷和動障礙，只可能加深其他人對他們的偏見，當他們是次人一等。醫學名稱應該盡量尊重人嘅尊嚴，更不應該對已經受折磨嘅人造成傷害。
Garcia Pimenta M, Gruhnert RK, Fuermaier ABM, Groen Y. The role of executive functions in mediating the relationship between adult ADHD symptoms and hyperfocus in university students. Res Dev Disabil. 2024 Jan;144:104639. doi: 10.1016/j.ridd.2023.104639.
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文：黃震遐醫生 Facebook（原發佈日期：2025年10月16日）。本文經作者授權由 Konghub 整理轉載，保留粵文原意及醫學文獻資料。
醫學資訊只供公眾教育，唔代替個人診斷或治療建議；如有症狀或用藥疑問，請向合資格醫護人員查詢。
