專注力失調及過度活躍係病抑或另類性格？

專注力失調及過度活躍係病抑或另類性格？

專注力失調及過度活躍七成同遺傳有關。學業、工作、婚姻、人際關係都往往難於一般人。因此，有呢個情況似乎係一種負累。

但其實，人口中至少十個人中有一名。而且不少人由於徵狀輕微，到成年後始被發現，實際數字可能高好多。

但係，奇怪就在此。如果按一般理解，應該係劣汰強存，點解專注力失調及過度活躍冇被淘汰殆盡？一個家族如果代代相傳讀書，事業都弱不如人，又點可能繁盛落去？

答案可能在於專注力失調及過度活躍者並非冇用，而係社群嘅必須有成員，甚至可能係社群遇到新挑戰時嘅存亡所繫人物。

自古而來，人生存喺一個變幻不息嘅環境。即使有啲變化有規律，周期如果長久，都難以被人察覺。因此，正如故人說，好難一本通勝睇到老，每一代人都要尋求方法對付新問題。社群需要能夠發掘出新答案嘅人，亦需要可以破解未曾被解決嘅困擾。

科學上，我哋知道創新力同不按牌理出章，不墨守成規有關。死咕咕跟住舊路搵新答案幾難唔失敗。不按牌理出章，始有機會突破，尋找出新方案。而專注力失調及過度活躍者係經常會心猿意馬，天馬行空，思想離群，想到常人唔會去嘅地方。因此可以為前無古人之遇，搵出答案，為社群解圍。

專注力失調及過度活躍者者不能夠按照正統學校讀書。自從有咗科舉，華人思路就似被古代婦女纏腳布一樣纏到畸形殘障。但古代具有創力者往往都係被科舉淘汰屢次擊敗者。創活字印刷，丹藥和急症書的初創，發明水法取銅，第一部機械工程書，都唔係科舉制度寵兒所為。雖然我哋唔知道呢啲人中，邊位係專注力失調及過度活躍者，但從此可見，思想似野馬四奔過度活躍，因而讀書不佳，制度淘汰者，反而都可能係社會進步來源。

正因為咁，自然演化規律嘅劣汰強存機制唔單止冇洶汰，反而重保存咗專注力失調及過度活躍。

今個月，歐洲神經心理藥劑學會大會上就有篇文報告跟據對750名專注力失調及過度活躍者或一般人分析，創新力同心念遊蕩，天馬行空有關。但有目標嘅心思遊蕩更有效引起創新。專注力失調及過度活躍者比一般人更容許心猿意馬，天馬行空。而其中，能控管心思遊蕩，令遊蕩有方向，就會更成功。

由此可見，只要專注力失調及過度活躍唔過龍，並且學悉控管心思遊蕩，呢啲朋友人生可以好成功。

不同人對即時滿足要求不同，因此受來自外界或心思嘅雜念影響會唔同，心思遊蕩，天馬行空程度亦可不同。被診斷為專注力失調及過度活躍者只係正常人注意力及裁決力譜系中嘅一端，另一端可能係墨守成規，毫無新意者。應該只有當失調或過度活躍到干預日常生活或無理破壞社會規範時始當作病來睇。其他具有專注力失調及過度活躍性格者應該只係人生多樣化正常範圍譜系中一種而已。

Hoogman M, Stolte M, Baas M, Kroesbergen E. Creativity and ADHD: A review of behavioral studies, the effect of psychostimulants and neural underpinnings. Neurosci Biobehav Rev. 2020 Dec;119:66-85. doi: 10.1016/j.neubiorev.2020.09.029.

Stolte M, Trindade-Pons V, Vlaming P, Jakobi B, Franke B, Kroesbergen EH, Baas M, Hoogman M. Characterizing Creative Thinking and Creative Achievements in Relation to Symptoms of Attention-Deficit/Hyperactivity Disorder and Autism Spectrum Disorder. Front Psychiatry. 2022 Jul 1;13:909202. doi: 10.3389/fpsyt.2022.909202

關於作者：黃震遐醫生

黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。

作者理念：「上醫治未病，中醫治欲病，下醫治已病。」

原文：黃震遐醫生 Facebook（原發佈日期：2025年10月16日）。本文經作者授權由 Konghub 整理轉載，保留粵文原意及醫學文獻資料。

醫學資訊只供公眾教育，唔代替個人診斷或治療建議；如有症狀或用藥疑問，請向合資格醫護人員查詢。