請不要政治化自閉症問題
美國總統特朗普同衛生部長小甘迺迪日前舉行相關自閉症政策記者會，宣佈美國藥物局(FDA)會更改止痛退燒藥乙醯胺酚(牌子包括港人慣見嘅必理痛)標貼，要提醒醫生及孕婦，呢隻藥同自閉症及專注力不足過度活躍症有關聯，因此要謹慎使用。好可惜，特朗普就多口，加多一句，話乙醯胺酚唔好，婦女要搏命抗拒使用。
跟住，就不少特朗普擁躉直情當咗呢隻藥係自閉症原因。網上不少特朗普擁躉更係上線上綱標榜不同意見者為左膠，將成件事政治化。我本來以為只係美國咁，想不到，連不少香港同台灣人都盲目跟風。
大家應該明白，咩係關聯。關聯係指兩件現象經常相伴出現。夜晚見到月亮星星，但係並唔係因為有夜晚始有月亮星星。亦唔係因為有月亮星星始有夜晚。兩者中沒有因果關係。擔遮時往往鞋濕，係因為落雨天，要擔遮，唔係擔遮造成鞋濕。擔遮同鞋濕有關聯係因為同一個原因，落雨，所造成。絕大多數孕婦服用乙醯胺酚，係因為發燒或其他不適。如果佢哋用得比較多，亦可以係因為燒得勢利。造成發燒嘅病毒或細菌可能始係病因。
目前，乙醯胺酚同自閉症及專注力不足過度活躍症有關聯，未有因果關係證據。特登去分析有冇因果關係嘅研究都並不認為有因果關係。其實，呢隻藥已經用咗幾十年，同嬰兒疫苗一樣，喺香港都有幾十年使用歷史，亦根本解釋唔到香港近十幾年來自閉症大幅上升原因。
未有足夠證據前，如果要偏向謹慎，提話有關關聯，冇乜唔妥。實質上，有隻抗腦癎症藥，FDA亦有提話可能對心臟有害可能，近年數據始證實其實係安全嘅。
但係講過龍，就會有問題。目前，選擇有限，孕婦止痛止燒，最安全係呢隻藥。如果唔用，用乜好嘞？男仔唔懷孕，當然可以口輕輕，叫孕婦搏命唔用。
更嚴重係，如果錯誤散播消息令人以為服乙醯胺酚係自閉症或專注力不足過度活躍症原因，自閉症或專注力不足過度活躍症小朋友嘅媽媽就會自咎自己服過隻藥，或被人指斥為仔女有病原因。於是受到二次傷害。
繼續探討大家用嘅藥安唔安全係好事。但呢應該係科學慎重工作而並不應該係嘩眾取寵方式講一啲未有足夠證據嘅指控。不應該傷害嗰啲夠辛苦嘅父母。
更不應該話不同意見者係乜乜左膠。咁做只係會阻住科學正當運作。累咗對自閉症主要真兇嘅追查。
Damkier P, Gram EB, Ceulemans M, Panchaud A, Cleary B, Chambers C, Weber-Schoendorfer C, Kennedy D, Hodson K, Grant KS, Diav-Citrin O, Običan SG, Shechtman S, Alwan S. Acetaminophen in Pregnancy and Attention-Deficit and Hyperactivity Disorder and Autism Spectrum Disorder. Obstet Gynecol. 2025 Feb 1;145(2):168-176. doi: 10.1097/AOG.0000000000005802
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文：黃震遐醫生 Facebook（原發佈日期：2025年9月26日）。本文經作者授權由 Konghub 整理轉載，保留粵文原意及醫學文獻資料。
醫學資訊只供公眾教育，唔代替個人診斷或治療建議；如有症狀或用藥疑問，請向合資格醫護人員查詢。
