可唔可以用抗體醫柏金森病？
幾個朋友都有心特登同我討論一啲新研究進展。可惜最近比較忙，冇時間消化再寫。
其中一個有趣題目係柏金森病嘅發病機制。
我哋都知道阿兹海默型認知障礙症同兩隻異常蛋白質累積有關。而柏金森病就都係同異常蛋白有關，只不過就唔係阿兹海默型認知障礙症嘅濤蛋白同澱粉樣蛋白，而係另一隻，α-突触核蛋白。呢隻蛋白由神經細胞傳開就會引致多巴胺細胞消失，造成症狀。
人體正常神經信息傳遞需要α-突触核蛋白。但呢啲蛋白有時會疊錯形狀，變成有毒嘅病體。而佢哋可以似細菌、病毒咁傳染開，由一隻細胞傳到第隻細胞，造成傷害。
病態嘅α-突触核蛋白係依靠群埋淋巴细胞活化基因3(lag3)而可以從一隻細胞傳到第隻細胞。可以咁做，至少靠八隻有能力穿過細胞膜嘅蛋白。舊年時，研究人員報導原來lag3夾埋澱粉樣β前體樣蛋白1 (aplp1)一齊運作，係病態α-突触核蛋白作怪嘅主要幫兇。九成α-突触核蛋白傳播都同呢兩隻蛋白結伴有關。小鼠如果冇咗呢兩隻蛋白嘅基因就唔受病態α-突触核蛋白影響。只係用針對lag3抗體，就可以大幅減少α-突触核蛋白所引致傷害。
今年研究人員再喺化驗室內證實淋巴细胞活化基因3(lag3)係α-突触核蛋白傷害人類多巴胺細胞嘅關鍵蛋白，而抗體可以有效減少傷害程度。因此，用lag3抗體係一個極有機會阻止柏金森病惡化嘅治療方法。
目前其實已經有lag3抗體得到批准使用來醫病。因此，試用來醫治柏金森病嘅臨床試驗應該唔使等太耐就見得到。
雖然咁，但實際去到實用就未必三兩年可以見到。
原因係現在已使用嘅抗體Relatlimab係用來醫癌症。通常都係連同另一隻藥Nivolumab一齊使用。因此，比較難清楚單獨用時，副作用點。兩隻並用時嚴重副作用包括肌炎、重症肌無力、心肌炎、腸炎等等。而癌症同柏金森病唔同，究竟要注射幾多劑量，幾耐，都需要澄清楚。
但無論如何，呢個明顯係一個嶄新治理方法，有機會改變成個治療模式。而配搭埋用皮脂等早診方式，柏金森病亦多數會有黃金窗期，要好好使用。另一方面，柏金森病似阿兹海默病都係所謂腦退化症，現在都一一證實係由致病蛋白傳染所造成。再稱為腦退化真係太落後了。
Yang X, Jeong D, Madeo G, et al Neuronal LAG3 facilitates pathogenic α-synuclein neuron-to-neuron propagation. bioRxiv [Preprint]. 2025 Jan 3:2025.01.03.631221. doi: 10.1101/2025.01.03.631221
Mao X, Gu H, Kim D,et al. Aplp1 interacts with Lag3 to facilitate transmission of pathologic α-synuclein. Nat Commun. 2024 May 31;15(1):4663. doi: 10.1038/s41467-024-49016-3.
Frey C, Etminan M. Adverse Events of PD-1, PD-L1, CTLA-4, and LAG-3 Immune Checkpoint Inhibitors: An Analysis of the FDA Adverse Events Database. Antibodies (Basel). 2024 Jul 17;13(3):59. doi: 10.3390/antib13030059.
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文來源與授權
本文經黃震遐醫生授權，由 Konghub 整理及轉載。查看 Facebook 原帖。
醫療免責聲明
本文只供健康教育及一般參考，唔構成個人醫療診斷或治療建議。如有症狀或用藥疑問，請向合資格醫護人員查詢。